നയന്‍താരയെ നായികയാക്കി ആര്‍ജെ ബാലാജി സംവിധാനം ചെയ്ത ‘മൂക്കുത്തി അമ്മന്‍’ ചിത്രത്തിന്റെ രണ്ടാം ഭാഗം വരുന്നു. തിയേറ്ററില്‍ വലിയ പ്രതികരണം നേടാതിരുന്ന ചിത്രത്തിന്റെ രണ്ടാം ഭാഗത്തില്‍ നയന്‍താരയല്ല, പകരം കോളിവുഡില്‍ നിന്നും മറ്റൊരു സൂപ്പര്‍ താരം നായികയായി എത്തും എന്നായിരുന്നു റിപ്പോര്‍ട്ടുകള്‍.
നടി തൃഷ മൂക്കുത്തി അമ്മനായി എത്തുമെന്നുള്ള റിപ്പോര്‍ട്ടുകളും എത്തിയിരുന്നു. എന്നാല്‍ ഈ വാര്‍ത്തകളെല്ലാം തള്ളി മൂക്കുത്തി അമ്മന്‍ 2 പ്രഖ്യാപിച്ചിരിക്കുകയാണ് ചിത്രത്തിന്റെ അണിയറ പ്രവര്‍ത്തകര്‍. തൃഷയല്ല, നയന്‍താര തന്നെയാണ് ചിത്രത്തില്‍ അമ്മനായി എത്തുക എന്നാണ് അണിയറപ്രവര്‍ത്തകര്‍ വ്യക്തമാക്കുന്നത്.
‘ഒരു ദൈവിക യുദ്ധം ഉടന്‍ ആരംഭിക്കുന്നു’ എന്ന ടാഗ് ലൈനോടെയാണ് മൂക്കുത്തി അമ്മന്‍ 2 പ്രഖ്യാപിച്ചത്. നായികയായി നയന്‍താര തന്നെയാണെങ്കിലും ചിത്രത്തിലെ മറ്റ് അണിയറ പ്രവര്‍ത്തകരെ കുറിച്ചുള്ള വിവരങ്ങള്‍ പുറത്തുവിട്ടിട്ടില്ല. ആര്‍ജെ ബാലാജി ആവില്ല പുതിയ ചിത്രത്തിന്റെ സംവിധായകന്‍ എന്നും റിപ്പോര്‍ട്ടുകളുണ്ട്.
സംവിധാനത്തിനൊപ്പം ചിത്രത്തില്‍ ബാലാജി ഒരു പ്രധാന കഥാപാത്രമായിരുന്നു. ഒരു ലോക്കല്‍ ടിവി റിപ്പോര്‍ട്ടറായിട്ടായിരുന്നു ബാലാജി ചിത്രത്തില്‍ എത്തിയത്. ഉര്‍വശി, സ്മൃതി വെങ്കട്ട്, മധു മൈലാങ്കോടി, അഭിനയ, മൗലി, അജയ് ഘോഷ് എന്നിവരായിരുന്നു പ്രധാന കഥാപാത്രങ്ങളെ അവതരിപ്പിച്ചത്.
