തിയേറ്ററില്‍ ആവേശപ്പൂരം തീര്‍ത്ത ‘ജയിലര്‍’ ഇനി ഒ.ടി.ടിയിലേക്ക്. നെല്സണ് ദിലീപ്കുമാര്‍ സംവിധാനം ചെയ്ത ചിത്രം രജനികാന്തിന്റെ താരപരിവേഷത്തെ കാലാനുസൃതമായി പുതുക്കി അവതരിപ്പിച്ച ചിത്രമാണ്. മോഹന്‍ലാല്‍, ശിവരാജ് കുമാര്‍ അടക്കമുള്ള താരങ്ങളുടെ പ്രകടനവും ഏറെ കൈയ്യടികള്‍ നേടിയിരുന്നു.
ഓഗസ്റ്റ് 10ന് ആണ് ജയിലര്‍ തിയേറ്ററുകളില്‍ എത്തിയത്. ചിത്രം സെപ്റ്റംബര്‍ 7ന് ആമസോണ്‍ പ്രൈം വീഡിയോയില്‍ സ്ട്രീമിംഗ് ആരംഭിക്കും. തമിഴിന് പുറമെ മലയാളം, തെലുങ്ക്, കന്നഡ, ഹിന്ദി ഭാഷകളിലും ചിത്രം കാണാനാവും. സണ്‍ പിക്‌ചേഴ്‌സ് പുറത്തുവിട്ട രണ്ടാഴ്ചത്തെ ആഗോള ഗ്രോസ് 525 കോടി ആയിരുന്നു.
അതേസമയം ചിത്രത്തിന്റെ വിജയം ആഘോഷിക്കുന്നതിന്റെ ഭാഗമായി രജനികാന്തിനും സംവിധായകന്‍ നെല്സണ് ദിലീപ്കുമാറിനും നിര്‍മ്മാതാക്കള്‍ സമ്മാനങ്ങള്‍ നല്‍കിയിരുന്നു. 1.24 കോടി വില വരുന്ന ബിഎംഡബ്ല്യു എക്‌സ് 7 കാര്‍ ആണ് സണ്‍ പിക്‌ചേഴ്‌സ് രജനിക്ക് സമ്മാനമായി കൊടുത്തത്.
നെല്സണ് 1.44 കോടി വിലയുള്ള പോര്‍ഷെ മക്കാന്‍ എസ് എന്ന കാറും. നേരത്തെ നല്‍കിയ 110 കോടി പ്രതിഫലത്തിന് പുറമെ പ്രോഫിറ്റ് ഷെയറിംഗ് പ്രകാരമുള്ള 100 കോടിയുടെ ചെക്കും സണ്‍ പിക്‌ചേഴ്‌സ് ഉടമ കലാനിധി മാരന്‍ കഴിഞ്ഞ ദിവസം രജനികാന്തിന് സമ്മാനിച്ചിരുന്നു.