കരിയറിലെ 170-ാം ചിത്രത്തില്‍ പൊലീസ് വേഷത്തില്‍ കസറി രജനികാന്ത്. ടി.ജെ ജ്ഞാനവേലിന്റെ സംവിധാനത്തില്‍ ഒരുങ്ങുന്ന ‘വേട്ടയ്യൻ’ ചിത്രത്തിന്റെ പ്രിവ്യൂ വീഡിയോ ആരാധകര്‍ ഏറ്റെടുത്തിരിക്കുകയാണ്. യൂട്യൂബ് ട്രെന്‍ഡിങ് ലിസ്റ്റില്‍ രണ്ടാമതായി തുടരുകയാണ് പ്രിവ്യൂ. അമിതാഭ് ബച്ചന്‍ അടക്കം വന്‍ താരനിരയാണ് ചിത്രത്തില്‍ അണിനിരക്കുന്നത്.
മലയാളി നടന്‍ സാബുമോന്‍ ആണ് സിനിമയിലെ മറ്റൊരു സര്‍പ്രൈസ് കാസ്റ്റ്. ചിത്രത്തില്‍ വില്ലനായാണ് സാബുമോന്‍ എത്തുക. ഫഹദ് ഫാസില്‍, റാണ ദഗുബതി, മഞ്ജു വാര്യര്‍, കിഷോര്‍, റിതിക സിങ്, ദുഷാര വിജയന്‍, ജിഎം സുന്ദര്‍, അഭിരാമി, രോഹിണി, റാവോ രാമേഷ്, രമേഷ് തിലക്, രക്ഷന്‍ എന്നിവരാണ് ചിത്രത്തിലെ പ്രധാന താരങ്ങള്‍.
ജയ് ഭീം എന്ന ചിത്രത്തിനു േശഷം ഞ്ജാനവേല്‍ സംവിധാനം ചെയ്യുന്ന ചിത്രം കൂടിയാണിത്. എസ്.ആര്‍. കതിര്‍ ആണ് ഛായാഗ്രഹണം. സംഗീതം അനിരുദ്ധ്. ആക്ഷന്‍ അന്‍പറിവ്. എഡിറ്റിങ് ഫിലോമിന്‍ രാജ്. ലൈക പ്രൊഡക്ഷന്‍സ് ആണ് നിര്‍മ്മാണം. ചെന്നൈ, തിരുവനന്തപുരം എന്നിവിടങ്ങളായിരുന്നു സിനിമയുടെ പ്രധാന ലൊക്കേഷന്‍.
33 വര്‍ഷത്തിന് ശേഷം രജനികാന്തും അമിതാഭ് ബച്ചനും ഒന്നിക്കുന്ന ചിത്രമെന്ന പ്രത്യേകതയും വേട്ടയ്യനുണ്ട്. മുകുള്‍ എസ് ആനന്ദ് സംവിധാനം ചെയ്ത് 1991 ല്‍ പുറത്തിറങ്ങിയ ‘ഹം’ എന്ന ചിത്രത്തിലാണ് അമിതാഭ്- രജനി കൂട്ടുക്കെട്ട് അവസാനമായി ഒന്നിച്ചഭിനയിച്ചത്. ചിത്രം ഒക്ടോബര്‍ പത്തിന് തിയേറ്ററുകളിലെത്തും.