വിജയ് ചിത്രം ‘ദ ഗോട്ട്’ കാണാന്‍ കേരളത്തിലെ ആരാധകരും കാത്തിരിക്കേണ്ടി വരും. കേരളത്തിലും പുലര്‍ച്ചെ നാല് മണിക്കുള്ള ഫാന്‍സ് ഷോ ഉണ്ടാവില്ല എന്നാണ് റിപ്പോര്‍ട്ടുകള്‍. പതിവ് വിജയ് സിനിമകള്‍ പോലെ കേരളത്തില്‍ ചിത്രത്തിന് നാല് മണി ഷോ ഉണ്ടാകാന്‍ സാധ്യതയില്ല എന്നാണ് ട്രേഡ് അനലിസ്റ്റ് ശ്രീധര്‍ പിള്ളെ റിപ്പോര്‍ട്ട് ചെയ്യുന്നത്.
കേരളത്തില്‍ ആദ്യ ഷോ ഏഴ് മണിക്ക് ആരംഭിക്കും. തമിഴ്‌നാട്ടില്‍ 9 മണിക്കും കര്‍ണാടകയില്‍ ഏഴ് മണിക്കും ഷോ ആരംഭിക്കും എന്നാണ് ഇപ്പോള്‍ പുറത്തുവരുന്ന റിപ്പോര്‍ട്ട്. യുഎസ്എയില്‍ ഇന്ത്യന്‍ സമയം 6 മണിക്ക് ഷോ ആരംഭിക്കുമെന്നാണ് ശ്രീധര്‍ പിള്ളെ പങ്കുവച്ച ട്വീറ്റില്‍ പറയുന്നത്.
സെപ്റ്റംബര്‍ 5 നാണ് ഗോട്ട് റിലീസ് ചെയ്യുന്നത്. സയന്‍സ് ഫിക്ഷന്‍ ആക്ഷണ്‍ ഗണത്തില്‍ പെടുന്ന ചിത്രം സംവിധാനം ചെയ്തിരിക്കുന്നത് വെങ്കട് പ്രഭു ആണ്. അച്ഛനും മകനുമായി ഡബിള്‍ റോളില്‍ ആണ് ചിത്രത്തില്‍ വിജയ് എത്തുന്നത്.
എജിഎസ് എന്റര്‍ടെയ്ന്‍മെന്റിന്റെ ബാനറില്‍ കല്‍പാത്തി എസ് അഘോരം, കല്‍പാത്തി എസ് ഗണേഷ്, കല്‍പാത്തി എസ് സുരേഷ് എന്നിവര്‍ ചേര്‍ന്നാണ് നിര്‍മ്മിക്കുന്നത്. യുവന്‍ ശങ്കര്‍ രാജയാണ് ചിത്രത്തിന് സംഗീതം ഒരുക്കിയിരിക്കുന്നത്.
മീനാക്ഷി ചൗധരി, പ്രശാന്ത്, പ്രഭുദേവ, ജയറാം, അജ്മല്‍ അമീര്‍, മോഹന്‍, യോഗി ബാബു, വിടിവി ഗണേഷ്, സ്‌നേഹ, ലൈല, വൈഭവ്, പ്രേംജി അമരന്‍, അരവിന്ദ്, അജയ് രാജ്, പാര്‍വതി നായര്‍, കോമള്‍ ശര്‍മ്മ, യുഗേന്ദ്രന്‍, അഭ്യുക്ത മണികണ്ഠന്‍, അഞ്ജന കിര്‍ത്തി, ഗഞ്ചാ കറുപ്പ് എന്നിങ്ങനെ നിരവധി താരങ്ങളും ചിത്രത്തില്‍ വേഷമിടുന്നുണ്ട്.
