2024ലെ തമിഴ് റിലീസുകളില്‍ ഓപ്പണിങ് ഡേ കളക്ഷനില്‍ ഒന്നാം സ്ഥാനത്ത് എത്തി വിജയ് ചിത്രം ‘ദ ഗോട്ട്’. സമ്മിശ്രപ്രതികരണങ്ങളാണ് ആദ്യ ദിനം തിയേറ്ററുകളില്‍ നിന്നും ലഭിച്ചത് എങ്കിലും നല്ല കളക്ഷന്‍ തന്നെയാണ് ചിത്രത്തിന് ലഭിച്ചിരിക്കുന്നത്. ഇന്ത്യയില്‍ നിന്ന് 44 കോടി രൂപയോളമാണ് ചിത്രം സ്വന്തമാക്കിയിരിക്കുന്നത്.
എന്നാല്‍ വിജയ്‌യുടെ കഴിഞ്ഞ ചിത്രമായ ‘ലിയോ’യുടെ ഓപ്പണിങ് കളക്ഷന്‍ പരിശോധിക്കുമ്പോള്‍ ഇത് കുറവാണെങ്കിലും വാര്യാന്ത്യത്തില്‍ ചിത്രം 100 കോടി കടക്കുമെന്നാണ് അനലിസ്റ്റുകള്‍ അഭിപ്രായപ്പെടുന്നത്. ലിയോ ആദ്യ ദിവസം ഇന്ത്യയില്‍ 63 കോടി രൂപയില്‍ അധികം കളക്ഷന്‍ നേടിയിരുന്നു.
തമിഴ്നാട്ടില്‍ ഗോട്ടിന് ഏകദേശം 38 കോടി രൂപയാണ് ആദ്യ ദിനത്തില്‍ നേടാനായത്. ചിത്രത്തിന്റെ തെലുങ്ക് പതിപ്പ് 3 കോടി രൂപയും ഹിന്ദി പതിപ്പ് 1.7 കോടി രൂപയും സ്വന്തമാക്കിയിട്ടുണ്ട്. പ്രീ-സെയില്‍സിലും അഡ്വാന്‍സ് ടിക്കറ്റ് ബുക്കിംഗിലുമായി ഗോട്ട് 65 കോടി രൂപയോളം നേടിയിരുന്നു.
ചിത്രം ആദ്യ ദിവസം ബോക്സ് ഓഫീസില്‍ 90 കോടിക്ക് മുകളില്‍ ഗ്രോസ് കളക്ഷന്‍ പ്രതീക്ഷിച്ചിരുന്നു. എന്നാല്‍ അത്രയും നേടാന്‍ ഗോട്ടിന് സാധിച്ചിട്ടില്ല. ചിത്രത്തില്‍ ട്രിപ്പിള്‍ റോളിലാണ് വിജയ് പ്രത്യക്ഷപ്പെടുന്നത്. ചിത്രത്തിന്റെതായി നേരത്തെ എത്തിയ ഗാനത്തിനും ട്രെയ്‌ലറിനും വിമര്‍ശനങ്ങള്‍ എത്തിയിരുന്നു.
ഇതാവാം ഓപ്പണിങ് ഡേ കളക്ഷന്‍ കുറയാന്‍ കാരണമായത്. അതേസമയം, ചിത്രത്തിലെ കാമിയോ റോളുകള്‍ പ്രേക്ഷകര്‍ ആഘോഷമാക്കുന്നുണ്ട്. എംഎസ് ധോണി, തൃഷ, ശിവകാര്‍ത്തിയകേയന്‍ എന്നിവരാണ് കാമിയോ റോളുകളില്‍ എത്തിയത്. തൃഷയ്‌ക്കൊപ്പമുള്ള വിജയ്‌യുടെ ഗാനം പ്രേക്ഷകര്‍ തിയേറ്ററില്‍ ഏറ്റെടുത്തിരുന്നു.