ബിഗ് ബോസില്‍ നിന്നും പുറത്തായ അസി റോക്കിക്ക് കേരളത്തില്‍ വന്‍വരവേല്‍പ്പ്. പുഷ്പഹാരവും കിരീടവും ധരിപ്പിച്ച് ജയ് വിളികളോടെയാണ് ആരാധകര്‍ റോക്കിയെ വരവേറ്റത്. സഹമത്സരാര്‍ത്ഥിയായ സിജോയെ കയ്യേറ്റം ചെയ്തതിന്റെ പേരിലാണ് ബിഗ് ബോസ് ഹൗസില്‍ നിന്നും റോക്കിയെ പുറത്താക്കിയത്.
പരസ്പരം വീട്ടുകാരെ വിളിച്ചതിനാണ് സിജോയും റോക്കിയും തമ്മില്‍ വഴക്കായത്. സിജോ റോക്കിയുടെ താടിയില്‍ പിടിച്ചതോടെ ദേഹത്ത് തൊട്ട് നോക്കടാ എന്ന് റോക്കി പറയുകയായിരുന്നു. റോക്കിയുടെ തോളത്ത് സിജോ കൈവച്ചതോടെ സിജോയുടെ മുഖത്തേക്ക് റോക്കി അടിക്കുകയായിരുന്നു. പിന്നാലെയാണ് ബിബി ഹൗസിലെ നിയമലംഘനത്തിന് റോക്കിയെ പുറത്താക്കിയത്.
കണ്‍ഫെഷനില്‍ റൂമില്‍ പൊട്ടിക്കരയുന്ന റോക്കിയുടെ വീഡിയോയും പുറത്തുവന്നിരുന്നു. എന്നാല്‍ താന്‍ കരഞ്ഞ് മെഴുകിയിട്ടൊന്നുമില്ല എന്ന് റോക്കി മാധ്യമങ്ങളോട് പ്രതികരിച്ചു. ”അടിപൊളി ഗെയിമായിരുന്നു. പക്ഷെ ഞാന്‍ വലിയ ഗെയിമറൊന്നും അല്ല അതുകൊണ്ട് എനിക്ക് ഗെയിം കളിക്കാനൊന്നും പറ്റിയില്ല. പുറത്ത് എങ്ങനെയാണോ അങ്ങനെ തന്നെയാണ് അകത്തും നിന്നത്.”
”എനിക്ക് പേടിയൊന്നുമില്ല. പിന്നെ റോക്കി കരഞ്ഞ് മെഴുകി എന്നൊക്കെയുള്ള സംഭവങ്ങള്‍ കാണുന്നുണ്ട്. രണ്ട് കാര്യങ്ങള്‍ കാരണമാണ് ഞാന്‍ കരഞ്ഞ്. ഒന്നാമത്തെ കാര്യം ഞാന്‍ ആറ് വര്‍ഷം കൊണ്ട് കാത്തിരുന്ന് എനിക്ക് കിട്ടിയ ഒരു അവസരം മിസ് ആയി. ഒരാളുടെ ആക്ട് കൊണ്ടും ആക്ഷന്‍ കൊണ്ടും എന്റെ റിയാക്ഷന്‍ എവിടെയോ പോയി.”
”അതോര്‍ത്ത് ഞാന്‍ കരഞ്ഞു. രണ്ടാമത്തെ കാര്യം ഒരു ദിവസമെങ്കില്‍ ഒരു ദിവസം സിജോയെ ഞാന്‍ എന്റെ ഫ്രണ്ടായി കണ്ടിരുന്നു. അങ്ങനൊരാളിന്റെ പുറത്ത് കൈവെക്കേണ്ടി വന്നതില്‍ വിഷമമുണ്ട്. അയാളുടെ അമ്മയെയും അച്ഛനെയും കൂട്ടുകാരെയും സ്‌നേഹിക്കുന്നവരെയും ഓര്‍ത്താണ് ഞാന്‍ കരഞ്ഞത്. അല്ലാതെ പേടിച്ച് കരഞ്ഞതല്ല എന്നാണ് റോക്കി പറഞ്ഞത്.