കാസ്റ്റിങ് കൗച്ചിനെ കുറിച്ച് നേരത്തെ തുറന്നു പറഞ്ഞിട്ടുള്ള താരമാണ് നടി രശ്മി ദേശായ്. പതിനാറാം വയസില്‍ നേരിടേണ്ടി വന്ന കാസ്റ്റിങ് കൗച്ച് അനുഭവത്തെ കുറിച്ച് പറഞ്ഞിരിക്കുകയാണ് രശ്മി ഇപ്പോള്‍. ഉത്തരണ്‍, ദില്‍സേ ദില്‍ തക് തുടങ്ങിയ സീരിയലുകളിലൂടെയും റിയാലിറ്റി ഷോ ആയ ബിഗ് ബോസിലൂടെയും ശ്രദ്ധ നേടിയ താരമാണ് രശ്മി.
ബോളിവുഡ് ബബിളിന് നല്‍കിയ അഭിമുഖത്തിലാണ് കാസ്റ്റിങ് കൗച്ച് നേരിട്ടതിനെ കുറിച്ച് നടി പറഞ്ഞത്. ഒരു ഓഡിഷന് വിളിച്ചു. അവിടെ ചെന്നപ്പോള്‍ അയാള്‍ അല്ലാതെ മറ്റാരും അവിടെ ഇല്ലായിരുന്നു. വെറും പതിനാറ് വയസ് ആയിരുന്നു എനിക്ക് അന്ന് പ്രായം. എന്നെ ബോധരഹിതയാക്കാന്‍ അയാള്‍ ശ്രമിച്ചു.
എനിക്ക് അസ്വസ്ഥത അനുഭവപ്പെടുകയും ഒരു വിധത്തില്‍ അവിടെ നിന്ന് പുറത്തെത്തുകയും ചെയ്തു. കുറച്ച് മണിക്കൂറുകള്‍ക്ക് ശേഷം ഞാന്‍ എല്ലാക്കാര്യവും എന്റെ അമ്മയോട് പറഞ്ഞു. അടുത്ത ദിവസം ഓഡിഷന് വിളിച്ചയാളെ കാണാന്‍ അമ്മയ്ക്കൊപ്പം ഞാന്‍ പോയി. അവിടെ ചെന്ന അമ്മ, അയാളുടെ കരണത്തടിച്ചു എന്നാണ് രശ്മി പറയുന്നത്.
കാസ്റ്റിങ് കൗച്ച് എന്നത് യാഥാര്‍ഥ്യമാണെന്നും രശ്മി പറയുന്നുണ്ട്. എങ്കിലും എല്ലാ ഇന്‍ഡസ്ട്രിയിലും നല്ല വ്യക്തികളും മോശം വ്യക്തികളുമുണ്ട്. പില്‍ക്കാലത്ത് അതിശയിപ്പിക്കും വിധത്തിലുള്ള ആളുകള്‍ക്കൊപ്പം ജോലി ചെയ്യാന്‍ തനിക്ക് സാധിച്ചെന്നും രശ്മി വ്യക്തമാക്കുന്നുണ്ട്.