ബിഗ് ബോസ് റിയാലിറ്റി ഷോയില്‍ നിന്നും ഒരു താരം കൂടി പുറത്ത്. മഞ്ജു പത്രോസ് ആണ് കഴിഞ്ഞ ദിവസത്തെ എലിമിനേഷന്‍ റൗണ്ടില്‍ പുറത്തായിരിക്കുന്നത്. രജിത് കുമാര്‍, ആര്യ, ഫുക്രു, ജസ്ല എന്നിവരായിരുന്നു നോമിനേഷന്‍ ലിസ്റ്റില്‍ ഉണ്ടായിരുന്നത്. രസകരമായ ഒരു ഗെയിമിന് പിന്നാലെയായാണ് ആരാണ് പുറത്തേക്ക് പോവുന്നതെന്ന് മോഹന്‍ലാല്‍ വ്യക്തമാക്കിയത്.
ചിലര്‍ പുറത്ത് പോവണമെന്ന് പറഞ്ഞിട്ടുണ്ടാകാം, ചിലര്‍ രണ്ടാഴ്ച മതിയെന്ന് പറയും, മത്സരത്തില്‍ തുടരാന്‍ ആഗ്രഹിക്കുന്നവരും ഉണ്ടാകും. എന്തായാലും ഒരാളെ പുറത്തേക്ക് വിളിച്ചേ മതിയാവൂ എന്ന് പറഞ്ഞായിരുന്നു മോഹന്‍ലാല്‍ പുറത്തേക്ക് പോവുന്നയാളെ പ്രഖ്യാപിച്ചത്. വികാരപ്രകടനങ്ങളൊന്നുമില്ലാത്ത യാത്ര പറച്ചിലായിരുന്നു മഞ്ജുവിന്റേത്. താങ്ക് യൂ ലാലേട്ടാ എന്നായിരുന്നു താരത്തിന്റെ ആദ്യ പ്രതികരണം. വ്യക്തിപരമായി എല്ലാവരോടും യാത്ര ചോദിച്ചായിരുന്നു മഞ്ജു മോഹന്‍ലാലിന് അരികില്‍ എത്തിയത്.
ബിഗ് ബോസിലെ അനുഭവങ്ങള്‍ മാത്രമല്ല കൂട്ടിനായി എല്ലാവര്‍ക്കുമൊപ്പമുള്ള ഒരു സെല്‍ഫിയെടുക്കാനും ബിഗ് ബോസ് നിര്‍ദേശിക്കാറുണ്ട്. എലിമിനേഷനിലൂടെ പുറത്തേക്ക് പോവുന്നവര്‍ക്കാണ് ആ അവസരം ലഭിക്കാറുള്ളത്. നിറഞ്ഞ ചിരിയോടെയായിരുന്നു മഞ്ജു സെല്‍ഫിക്ക് പോസ് ചെയ്തത്. ചിരിച്ച മുഖത്തോടെയായിരുന്നു താരം ബിഗ് ബോസില്‍ നിന്നും ഇറങ്ങിയതും.