പൊതു ചടങ്ങില്‍ സീരിയല്‍ താരങ്ങള്‍ക്കെതിരെ മോശം പരാമര്‍ശം നടത്തിയ രാഷ്ട്രീയ നേതാവിന് അതേ വേദിയില്‍ തന്നെ തന്നെ മറുപടി നല്‍കി നടി മഞ്ജു പത്രോസ്. പരുമ്പിലാവില്‍ വച്ച് നന്ന കുടുംബശ്രീ സിഡിഎസ് രജത ജൂബിലി ആഘോഷ പരിപാടിയില്‍ സംസാരിക്കുന്ന മഞ്ജുവിന്റെ വീഡിയോ നടന്‍ കിഷോര്‍ സത്യയാണ് പങ്കുവച്ചിരിക്കുന്നത്. അഭിനയം എന്നത് ഒരു തൊഴില്‍ മേഖലയാണെന്ന് മഞ്ജു വ്യക്തമാക്കി.
”സീരിയില്‍ നടികള്‍ വരുന്നത് എനിക്കിഷ്ടമല്ല. ഞാന്‍ അങ്ങനെയുള്ള പരിപാടികള്‍ കാണാറില്ല. സാറിന് ഞങ്ങളെ ഇഷ്ടമല്ലാത്തത് അഭിനയിക്കുന്നത് കൊണ്ടാണോ, അതോ സാര്‍ കാണാഞ്ഞിട്ടാണോ എന്ന് അറിയില്ല. എന്തായാലും ഇതൊരു തൊഴില്‍ മേഖലയലാണ്.”
”അത്ര ഈസിയല്ല ഒരു മേഖലയിലും മുമ്പില്‍ എത്താന്‍. എനിക്ക് കൃഷി ഇഷ്ടമല്ല. അതുകൊണ്ട് ഒരു കര്‍ഷകന്‍ വേദിയില്‍ ഇരിക്കുന്നത് ഇഷ്ടമല്ലെന്ന് പറയുന്നതിന്റെ വൈരുദ്ധ്യത സാര്‍ ആലോചിച്ചാല്‍ കൊള്ളാം” എന്നാണ് മഞ്ജു പറഞ്ഞത്. അഭിമാനമായി മഞ്ജു എന്ന കുറിപ്പോടെയാണ് ഈ വീഡിയോ കിഷേര്‍ സത്യ പങ്കുവച്ചിരിക്കുന്നത്.
കിഷോര്‍ സത്യയുടെ കുറിപ്പ്:
അഭിമാനമായി മഞ്ജു പത്രോസ്. കഴിഞ്ഞ ദിവസം കുന്നംകുളത്ത് കുടുംബശ്രീ യുടെ ഒരു പരിപാടിയില്‍ ക്ഷണിച്ചതനുസരിച്ചു അഭിനേത്രി മഞ്ജു പത്രോസ് പങ്കെടുത്തു. എന്നാല്‍ ആ പരിപാടിയില്‍ പങ്കെടുത്ത ഒരു രാഷ്ട്രീയ നേതാവ് ടെലിവിഷന്‍ പരമ്പരകളെയും സീരിയല്‍ നടിമാരെയും അപമാനിക്കുന്ന തരത്തില്‍ വേദിയില്‍ വച്ച് സംസാരിക്കുകയുണ്ടായി. വേദനിച്ചെങ്കിലും തെല്ലും കൂസാതെ അദ്ദേഹത്തിന് മഞ്ജു വേദിയില്‍ വച്ച് തന്നെ മറുപടി പറഞ്ഞു.
സദസിലെ സ്ത്രീ കൂട്ടായ്മ കൈയ്യടികളോടെ അവരുടെ വാക്കുകളെ സ്വീകരിച്ചു. സ്ത്രീ ശക്തീകരണത്തിന്റെ മുഖമുദ്രയായ കുടുംബശ്രീ പരിപാടിയില്‍ വച്ചാണ് മഞ്ജുവിന് ഇങ്ങനെ പ്രതികരിക്കേണ്ടി വന്നുവെന്നത് ഒരു കാവ്യാനീതിയാവാം! ആര്‍ക്കും സിനിമയോ നാടകമോ സീരിയലോ കാണുകയോ കാണാതിരിക്കുകയുയോ ചെയ്യാം.
അത് ആ വ്യക്തിയുടെ പൂര്‍ണ്ണ സ്വാതന്ത്ര്യമാണ്, എന്നാല്‍ ക്ഷണിക്കപ്പെട്ട അതിഥിയായി ഒരു പരിപാടിയില്‍ പങ്കെടുക്കുന്ന കലാകാരനെയോ കലാകാരിയെയോ തന്റെ വ്യക്തിഗത ഇഷ്ടക്കേടിന്റെ പേരില്‍ അപമാനിക്കുന്നത് ശുദ്ധ അസംബന്ധമാണ്, അങ്ങേയറ്റം അപലപനീയവുമാണ് ആത്മധൈര്യം ചോരാതെ തന്നിലെ സ്ത്രീത്വത്തെയും കലാകാരിയെയും അഭിമാനത്തോടെ ആ വേദിയില്‍വച്ച് ഉയര്‍ത്തിപ്പിടിച്ച മഞ്ജു പത്രോസിനു അഭിനന്ദനങ്ങള്‍…. ആദരവ്….