ബിഗ് ബോസ് ഒടിടി 3 റിയാലിറ്റി ഷോയ്‌ക്കെതിരെ പരാതിയുമായി ശിവസേന ഏക്‌നാഥ് ഷിന്‍ഡെ വിഭാഗം. ജിയോ സിനിമയില്‍ സ്ട്രീം ചെയ്യുന്ന പരിപാടിയില്‍ പരസ്യമായി അശ്ലീലം കാണിക്കുന്നു എന്നാണ് പരാതി. ഷോയ്ക്കും അതിന്റെ നിര്‍മ്മാതാക്കള്‍ക്കുമെതിരെ നടപടി ആവശ്യപ്പെട്ട് ശിവസേനയുടെ മുതിര്‍ന്ന എംഎല്‍എ മനീഷ കയാണ്ഡെ തിങ്കളാഴ്ച മുംബൈ പൊലീസില്‍ പരാതി നല്‍കി.
ജൂലൈ 18ന് സംപ്രേഷണം ചെയ്ത എപ്പിസോഡില്‍ മത്സരാര്‍ഥികളായ കൃതിക മാലിക്കിന്റെയും അര്‍മാന്‍ മാലിക്കിന്റെയും കിടപ്പറ രംഗങ്ങള്‍ കാണിച്ചുവെന്നും ശിവസേന എംഎല്‍എ പറഞ്ഞു. അവിടെ നടക്കുന്നത് അശ്ലീലമാണ് നടക്കുന്നത്, അത് ചിത്രീകരിച്ചിരിക്കുന്നു. ഷോയില്‍ എല്ലാ പരിധികളും മറികടന്നിരിക്കുന്നു.
അതിനാല്‍ ഞങ്ങള്‍ മുംബൈ പൊലീസിനോട് നടപടിയെടുക്കാന്‍ അഭ്യര്‍ഥിക്കുകയും അവര്‍ക്ക് പരാതി നല്‍കുകയും ചെയ്തിട്ടുണ്ട്. റിയാലിറ്റി ഷോകളുടെ പേരില്‍ ഇങ്ങനെ അശ്ലീലം പരസ്യമായി കാണിക്കുന്നത് എത്രത്തോളം ശരിയാണ്. അത് യുവമനസുകളെ എങ്ങനെ സ്വാധീനിക്കും.
കുട്ടികള്‍ പോലും കാണുന്ന ഷോയാണിത്. ബിഗ് ബോസ് ഇനി ഒരു ഫാമിലി ഷോ അല്ല. അര്‍മാന്‍ മാലിക്കും കൃതിക മാലിക്കും എല്ലാ പരിധികളും ലംഘിച്ചു. അഭിനേതാക്കളെയും ഷോയുടെ സിഇഒയെയും അറസ്റ്റ് ചെയ്യാന്‍ ആവശ്യപ്പെട്ടിട്ടുണ്ട് എന്നാണ് മനീഷ കയാണ്ഡെ പരാതിയില്‍ പറയുന്നത്.
ഒടിടി ഉള്ളടക്കം നിയന്ത്രിക്കുന്നതിനുള്ള നിയമത്തിനായി കേന്ദ്രമന്ത്രി അശ്വിനി വൈഷ്ണവിനെ സമീപിക്കാനുള്ള പദ്ധതിയുണ്ട് തങ്ങള്‍ക്കെന്നും എംഎല്‍എ വ്യക്തമാക്കി. യൂട്യൂബര്‍ അര്‍മാന്‍ മാലികിന്റെ രണ്ടാം ഭാര്യയാണ് കൃതിക മാലിക്. അതേസമയം, ഷോയില്‍ നിന്നും പുറത്തായ മാലിക്കിന്റെ ആദ്യ ഭാര്യ പായല്‍ രണ്ടാഴ്ച മുമ്പ് എവിക്ട് ആയിരുന്നു.