ടി ജെ ജ്ഞാനവേൽ സംവിധാനം ചെയ്യുന്ന ചിത്രമാണ് തലൈവർ 170 എന്ന് താൽക്കാലികമായി പേര് നൽകിയിരിക്കുന്നത്, തമിഴകത്തെ സൂപ്പർ സ്റ്റാർ രജനികാന്തിന്റെ 170 ാം ചിത്രമാണിത്.വൻ താരനിരതന്നെ അണിനിരക്കുന്ന ചിത്രത്തിൽ ബോളിവുഡ് ഇതിഹാസം അമിതാബ് ബച്ചനും എത്തുന്നുണ്ട് എന്ന വിവരമാണ് ഇപ്പോൾ പ്രേക്ഷകരെ ആവേശത്തിലാഴ്ത്തുന്നത്.
മുപ്പത്തി മൂന്ന് വർഷങ്ങൾക്ക് ശേഷം രജനികാന്തിനൊപ്പം ബച്ചൻ സ്ക്രീന്‍ പങ്കിടുന്ന ചിത്രം കൂടിയാണ് തലൈവർ 170. സിനിമയുടെ ചിത്രീകരണം തുടരുകയാണ്.തലൈവർ 170ന്റെ മുംബൈ ഷെഡ്യൂളിനാണ് ഇന്ന് തിരശ്ശീല വീണത്. ഷെഡ്യൂൾ അവസനിച്ച വിവരം പങ്കുവച്ചുള്ള ട്വീറ്റിനൊപ്പം ബച്ചന്റെയും രജനിയുടെയും ഫോട്ടോയും ഷെയർ ചെയ്താണ് നിർമാതാക്കളായ ലൈക്ക പ്രൊഡക്ഷൻസ് അറിയിച്ചത്.
’33 വർഷങ്ങൾക്ക് ശേഷം വീണ്ടും ഒന്നിക്കുന്നു! ഇതിഹാസങ്ങളുടെ ഇരട്ടി ഡോസ് ആയിരിക്കും തലൈവർ 170′, എന്നാണ് നിർമാതാക്കൾ കുറിച്ചത്. ഏതാനും ദിവസങ്ങൾക്ക് മുൻപ് തിരുവനന്തപുരത്താണ് സിനിമയുടെ ചിത്രീകരണം ആരംഭിച്ചത്.അമിതാഭ് ബച്ചനും ഒപ്പം ഫഹദ് ഫാസിൽ, മഞ്ജുവാര്യർ, റാണാ ദഗുബട്ടി, റിതിക സിംഗ്, ദുഷാര വിജയൻ എന്നിവരും ചിത്രത്തിൽ പ്രധാന വേഷത്തിൽ എത്തുന്നുണ്ട്.
ലൈക പ്രൊഡക്ഷൻസിന്‍റെ ബാനറില്‍ സുബാസ്കരൻ ആണ് തലൈവർ 170 നിർമിക്കുന്നത്. അനിരുദ്ധ് രവിചന്ദ്രറാണ് സംഗീതം. മഞ്ജുവാര്യരുടെ നാലാമത്തെ തമിഴ് സിനിമ കൂടിയാണിത്. അതേസമയം, ജയിലര്‍ എന്ന ബ്ലോക് ബസ്റ്റര്‍ ചിത്രമാണ് രജനിയുടേതായി ഏറ്റവും ഒടുവില്‍ റിലീസ് ചെയ്തത്. മോഹൻലാൽ, ശിവരാജ് കുമാർ, വിനായകൻ, രമ്യ കൃഷ്ണ തുടങ്ങി വന്‍ താര നിര തന്നെ ചിത്രത്തിന്റെ ഭാഗമായിരുന്നു.