തമിഴകത്ത് ദൈവങ്ങളെ പോലെയാണ് പ്രിയ താരങ്ങളെ ആരാധകര്‍ കാണാറുള്ളത്. ആരാധകര്‍ തമ്മില്‍ ഫൈറ്റുകള്‍ നടക്കാറുണ്ടെങ്കിലും സൗഹൃദം കാത്തു സൂക്ഷിക്കുന്നവരാണ് താരങ്ങള്‍. സൂപ്പര്‍ താരങ്ങളായ രജനികന്തിന്റെയും കമല്‍ ഹാസന്റെയും സൗഹൃദം പ്രസിദ്ധമാണ്.
രജനികാന്തിനെ കുറിച്ച് കമല്‍ ഹാസന്‍ സംസാരിക്കുന്ന ഒരു വീഡിയോ സോഷ്യല്‍ മീഡിയയില്‍ ഇപ്പോള്‍ വീണ്ടും വൈറലാവുകയാണ്. രജനികാന്ത് ‘ദളപതി’ എന്ന സിനിമയെ കുറിച്ച് പറഞ്ഞപ്പോള്‍ അത് തെറ്റായി കേട്ടതിനെ കുറിച്ചാണ് കമല്‍ പറയുന്നത്.
”ഒരു കല്യാണ മണ്ഡപത്തില്‍ വച്ച് രജനി വന്നു താന്‍ ഒരു പുതിയ ചിത്രം ചെയ്യുകയാണ് എന്ന് പറഞ്ഞു. എന്റെ ചെവിയിലാണ് അദ്ദേഹം അത് പറഞ്ഞത്. ചിത്രത്തിന്റെ പേര് അദ്ദേഹം ‘ദളപതി’ എന്ന് പറഞ്ഞത് ഞാന്‍ കേട്ടത് ‘ഗണപതി’ എന്നാണ്. അദ്ദേഹം ചോദിച്ചു പേര് എങ്ങനെ?”
”ഞാന്‍ പറഞ്ഞു അത്ര പോരാ. അതെന്താ നല്ല ബലമുള്ള പേരല്ലേ എന്നായി അദ്ദേഹം. അത് ശരിയല്ല എന്ന് ഞാനും. പിന്നെയാണ് മനസിലായത് ഞാന്‍ കേട്ടത് തെറ്റിയതാണ് എന്ന്. ‘ദളപതി’ എന്നായിരുന്നു അദ്ദേഹം പറഞ്ഞത്. ഞങ്ങളുടെ ഫാന്‍സ് തമ്മില്‍ കടുത്ത മത്സരമൊക്കെയുണ്ട്.”
”പക്ഷേ ഞങ്ങള്‍ രണ്ടു പേരും മാത്രമാകുമ്പോള്‍ സംസാരിക്കുന്നത് എന്ത് എന്നറിഞ്ഞാല്‍ നിങ്ങള്‍ അത്ഭുതപ്പെടും. ഫാന്‍സ് മത്സരമൊക്കെ ഞങ്ങളും അങ്ങനെ വെറുതെ വിട്ടിരിക്കുകയാണ്. കാരണം രണ്ടു ഗോള്‍ പോസ്റ്റ് ഉണ്ടെങ്കിലേ മാച്ച് ഉള്ളൂ” എന്നാണ് കമല്‍ പറയുന്നത്.