സിനിമയില്‍ സജീവമല്ലെങ്കിലും നടി സമീറ റെഡ്ഡിയുടെ സോഷ്യല്‍ മീഡിയ പോസ്റ്റുകള്‍ വൈറലാകാറുണ്ട്. തെന്നിന്ത്യയിലും ബോളിവുഡിലും ഒരുപോലെ തിളങ്ങിയ നായിക ആയിരുന്നു സമീറ റെഡ്ഡി. എന്നാല്‍ വിവാഹശേഷം താരം സിനിമയില്‍ നിന്നും മാറി നില്‍ക്കുകയായിരുന്നു. കാസ്റ്റിംഗ് കൗച്ചിനെ കുറിച്ച് തുറന്നു സംസാരിച്ചിട്ടുള്ളയാളാണ് സമീറ.
ബോളിവുഡ് നടനില്‍ നിന്നും മോശം പെരുമാറ്റമുണ്ടായതും തന്നോട് പറയാതെ കിസ്സിംഗ് സീന്‍ വച്ചതിനെ കുറിച്ചും സമീറ പറഞ്ഞിരുന്നു. ഒരു ബോളിവുഡ് നടന്‍ തന്നെ കുറിച്ച് പറഞ്ഞത് നീ ഒട്ടും അപ്രോച്ചബിള്‍ അല്ലെന്നും ബോറിംഗ് ആണെന്നുമായിരുന്നു.
നീ ഒട്ടും ഫണ്‍ അല്ലെന്നും ഇനി നിനക്കൊപ്പം അഭിനയിക്കുമോ എന്ന് അറിയുക പോലുമില്ലെന്ന് പറഞ്ഞു. അതിന് ശേഷം അയാള്‍ക്കൊപ്പം താനൊരു സിനിമയിലും അഭിനയിച്ചിട്ടില്ല എന്നാണ് സമീറ പറഞ്ഞത്. ഒരു സിനിമയില്‍ തന്നെ അറിയിക്കാതെ തന്നെ കിസ്സിംഗ് സീന്‍ വച്ചതായും സമീറ പറയുന്നുണ്ട്.
ഒരു സിനിമ ചെയ്തു കൊണ്ടിരിക്കവെ പെട്ടെന്ന് കിസ്സിംഗ് സീന്‍ ഉണ്ടെന്ന് പറഞ്ഞു. അത് തീരുമാനിക്കുമ്പോള്‍ താന്‍ അവിടെ ഇല്ലായിരുന്നു, അതുകൊണ്ട് തയാറല്ല എന്ന് പറഞ്ഞു. എന്നാല്‍ നിങ്ങള്‍ മുസാഫിറില്‍ ചെയ്തിട്ടുണ്ടല്ലോ എന്നായിരുന്നു അവരുടെ മറുപടി.
ആയിരിക്കാം എന്നു കരുതി താന്‍ അത് തുടര്‍ന്നും ചെയ്യണമെന്നില്ലെന്ന് പറഞ്ഞു. സൂക്ഷിച്ച് വേണം പെരുമാറാനെന്നും നിന്നെ മാറ്റാന്‍ സാധിക്കുമെന്നും സംവിധായകന്‍ പറഞ്ഞതായാണ് സമീറ പറയുന്നത്. കൂടാതെ ഷൂട്ടിന് ശേഷം നടന്മാരുടെ കൂടെ കറങ്ങുകയോ പാര്‍ട്ടിയ്ക്ക് പോവുകയോ ചെയ്യില്ലെന്നും സമീറ വ്യക്തമാക്കുന്നുണ്ട്.