‘ഐസി 814 ദ കാണ്ഡഹാര്‍ ഹൈജാക്ക്’ എന്ന നെറ്റ്ഫ്‌ളിക്‌സ് സീരീസ് വിവാദത്തില്‍. ഐസി 814 വിമാനറാഞ്ചലിനെ ആസ്പദമാക്കിയ ഒരുക്കിയ സീരിസില്‍ വിമാനം റാഞ്ചിയ തീവ്രവാദികളുടെ പേര് മാറ്റിയതിനെ തുടര്‍ന്ന് നെറ്റ്ഫ്‌ളിക്‌സ് മേധാവിയെ കേന്ദ്രവാര്‍ത്താ വിതരണമാന്ത്രാലയം വിളിച്ചുവരുത്തിയെന്ന് എഎന്‍ഐ റിപ്പോര്‍ട്ട് ചെയ്തു.
സെപ്തംബര്‍ 3ന് ഹാജരാകണം എന്നാണ് നിര്‍ദേശമെന്നും റിപ്പോര്‍ട്ടുകളുണ്ട്. പാകിസ്താനിലെ ഹര്‍ക്കത്തുള്‍-മുജാഹിദ്ദീന്‍ എന്ന തീവ്രവാദി സംഘടനയില്‍പ്പെട്ട ഇബ്രാഹിം അക്തര്‍, ഷാഹിത് അക്തര്‍ സെയ്ദ്, സണ്ണി അഹമ്മദ് ഖൈ്വസി, മിസ്ത്രി സഹൂര്‍ ഇബ്രാഹിം, ഷാക്കീര്‍ എന്നിവരാണ് വിമാനം റാഞ്ചലിലെ പ്രതികള്‍.
എന്നാല്‍ സീരിസില്‍ ശങ്കര്‍, ഭോല, ചീഫ്, ഡോക്ടര്‍, ബര്‍ഗര്‍ എന്നീ പേരുകളിലാണ് ഈ കഥാപാത്രങ്ങള്‍ പ്രത്യക്ഷപ്പെടുന്നത്. തീവ്രവാദികളുടെ ഇരട്ടപ്പേരുകളാണ് ഇത് എന്നാണ് അണിയറ പ്രവര്‍ത്തകര്‍ അവകാശപ്പെടുന്നത്. അനുഭവ് സിന്‍ഹ സംവിധാനം ചെയ്ത സീരിസില്‍ വിജയ് വര്‍മ, അരവിന്ദ് സ്വാമി, ദിയാ മിര്‍സ, പങ്കജ് കപൂര്‍, നസുറുദ്ദീന്‍ ഷാ, പത്രലേഖ പോള്‍ എന്നിവരാണ് അഭിനയിക്കുന്നത്.
അതേസമയം, 1999ല്‍ ആണ് നേപ്പാളിലെ കാഠ്മണ്ഡുവിലുള്ള ത്രിഭുവന്‍ അന്താരാഷ്ട്ര വിമാനത്താവളത്തില്‍ നിന്നും ഇന്ത്യയിലെ ഡല്‍ഹിയിലുള്ള ഇന്ദിരാഗാന്ധി അന്താരാഷ്ട്ര വിമാനത്താവളത്തിലേക്ക് യാത്ര തിരിക്കെ തീവ്രവാദിവാദികള്‍ എയര്‍ലൈന്‍സ് വിമാനം 814 റാഞ്ചിയത്.
റാഞ്ചിയ വിമാനം ലാഹോര്‍, അമൃത്സര്‍, ദുബായ് എന്നിവിടങ്ങളില്‍ ഇറക്കിയ ശേഷം കാണ്ഡഹാര്‍ വിമാനത്താവളത്തില്‍ ഇറക്കി. ദുബായില്‍ 176 യാത്രക്കാരില്‍ 27 പേരെ മോചിപ്പിച്ചെങ്കിലും ഒരാളെ മാരകമായി കുത്തുകയും നിരവധി പേര്‍ക്ക് പരിക്കേല്‍ക്കുകയും ചെയ്തു. ഇന്ത്യയിലെ ജയിലില്‍ കഴിഞ്ഞിരുന്ന മസൂദ് അസര്‍ അടക്കമുള്ള തീവ്രവദികളെ വിട്ടയച്ച ശേഷമാണ് ഏഴ് ദിവസത്തെ റാഞ്ചല്‍ അവസാനിച്ചത്.