മലയാളികള്‍ക്ക് ജര്‍മനിയില്‍ നഴ്‌സ് ജോലി ലഭ്യമാക്കാന്‍ സംസ്ഥാന തൊഴില്‍ വകുപ്പിന് കീഴിലുള്ള ഒഡെപെകും ജര്‍മനിയിലെ സര്‍ക്കാര്‍ സ്ഥാപനം ഡെഫയും ധാരണാപത്രം ഒപ്പുവെച്ചു. ജര്‍മനിയില്‍ ജോലി നേടാന്‍ ആഗ്രഹിക്കുന്ന നഴ്സുമാര്‍ക്കായി ഒഡെപെക് ഒരുക്കിയിട്ടുള്ള സൗജന്യ റിക്രൂട്ട്മെന്റ് പദ്ധതിയാണ് ‘വര്‍ക്ക്-ഇന്‍ ഹെല്‍ത്ത്, ജര്‍മനി.
പ്രസ്തുത സ്ഥാപനത്തിന്റെ എക്സിക്യൂട്ടീവ് ഡയറക്ടറായ തോര്‍സ്റ്റന്‍ കിഫര്‍, ഡെഫയിലെ മൈഗ്രേഷന്‍ കണ്‍സള്‍ട്ടന്റ് ആയ എഡ്ന മുളിരോ, ഓപ്പറേഷന്‍ മാനേജര്‍ പൗല ഷൂമാക്കാര്‍ എന്നിവര്‍ ഇതുമായി ബന്ധപ്പെട്ട ചര്‍ച്ചകള്‍ക്കായി കേരളത്തിലെത്തി.
ആയിരത്തി അഞ്ഞൂറോളം ഒഴിവുകളാണ് ഈ സാമ്പത്തിക വര്‍ഷം ജര്‍മനിയില്‍ പ്രതീക്ഷിക്കുന്നത്. ഡെഫയുമായി ചേര്‍ന്നുള്ള പങ്കാളിത്തം മുഖേന നഴ്സിംഗ് കൂടാതെ മറ്റു മേഖലകളിലേക്ക് കൂടി റിക്രൂട്ട്മെന്റ് വ്യാപിപ്പിക്കാന്‍ ഒഡെപെക് തീരുമാനിച്ചിട്ടുണ്ട്. സൗജന്യ ജര്‍മ്മന്‍ ഭാഷാപരിശീലനവും ഒഡെപെക് നല്‍കും.
ഇതുകൂടാതെ നഴ്സുമാര്‍ ജര്‍മനിയില്‍ ചെന്നതിനു ശേഷം രജിസ്ട്രേഷന് വേണ്ടി പാസ്സാകേണ്ട പരീക്ഷയ്ക്കായി നാട്ടില്‍ നിന്ന് തന്നെ അവരെ പരിശീലിപ്പിക്കാനും ഒഡെപെക് പദ്ധതിയിട്ടിട്ടുണ്ട്.