ലീഗുമായ ബന്ധം തുടരുമെന്ന് സമസ്ത ഉന്നതാധികാര സമിതി തീരുമാനിച്ചതായി ചന്ദ്രികയില്‍ വന്ന വാര്‍ത്ത തെറ്റാണെന്ന് സമസ്ത. മുശാവറ തീരുമാനം എന്ന പേരിലാണ് മുസ്ലിം ലീഗ് മുഖപത്രമായ ചന്ദ്രികയുടെ ഓണ്‍ലൈനില്‍ ഈ വാര്‍ത്ത നല്‍കിയിരിക്കുന്നത്. ഈ വാര്‍ത്ത വാസ്തവവിരുദ്ധമാണെന്ന് സമസ്ത വാര്‍ത്താക്കുറിപ്പ് ഇറക്കി.
പ്രവര്‍ത്തകര്‍ വഞ്ചിതരാകരുത് എന്നും സമസ്തയുടെ പത്രക്കുറിപ്പിലില്ലാത്ത വാചകമാണ് ചന്ദ്രിക ഓണ്‍ലൈനില്‍ നല്‍കിയിരിക്കുന്നത് എന്നും വാര്‍ത്താ ക്കുറിപ്പില്‍ പറയുന്നു. സാമുദായിക പ്രശ്‌നങ്ങളില്‍ ലീഗിനോട് സഹകരിക്കുന്ന രീതി തുടരും. അതേ സമയം പൂര്‍ണമായും ലീഗിന് വിധേയപ്പെടേണ്ടതില്ല എന്ന അഭിപ്രായമാണ് യോഗത്തില്‍ ഉയര്‍ന്നത്. രാഷ്ട്രീയ നിലപാട് വ്യക്തമാക്കികൊണ്ടുളള പ്രസ്താവനകള്‍ വേണ്ട എന്നുമാണ് യോഗത്തില്‍ തീരുമാനിച്ചത്.
കോഴിക്കോടാണ് സമസ്തയുടെ മുശാവറ യോഗം ചേര്‍ന്നത്. ഈ യോഗത്തിലെ തീരുമാനങ്ങളെ ചന്ദ്രിക വളച്ചൊടിച്ചുവെന്നാണ് സമസ്ത വാര്‍ത്താക്കുറിപ്പില്‍ പറയുന്നത്.