സിനിമയിലഭിനയിക്കാമെന്ന് പ്രലോഭിപ്പിച്ച് പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയ സംഭവത്തില്‍ യുവ സംവിധായകനും സുഹൃത്തും പിടിയില്‍. കുറുവങ്ങാട് കേളമ്പത്ത് ജാസിക് അലി (36), സുഹൃത്ത് എരഞ്ഞിക്കല്‍ മണ്ണാര്‍ക്കണ്ടി അല്‍ ഇര്‍ഫാത്തില്‍ ഷംനാജ് (33) എന്നിവരാണ് പൊലീസ് പിടിയിലായത്.
കുറവങ്ങാട് സ്വദേശിനിയായ പതിനേഴുകാരിയെയാണ് ഇവര്‍ തട്ടിക്കൊണ്ടുപോയത്. മകളെ കാണാനില്ലെന്ന് കാണിച്ച് രക്ഷിതാക്കള്‍ പൊലീസില്‍ പരാതി നല്‍കുകയായിരുന്നു. അന്വേഷണത്തിനൊടുവില്‍ കര്‍ണാടകയിലെ മടിവാളയില്‍ വച്ചാണ് ഇവരെ പിടികൂടിയത്.
സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പ്രതികളെ പിടികൂടിയത്. ഇവര്‍ ഗുണ്ടല്‍പ്പെട്ടയിലുണ്ടെന്ന് വിവരം ലഭിച്ചതിനെത്തുടര്‍ന്ന് പൊലീസ് അവിടെയെത്തിയെങ്കിലും രക്ഷപ്പെട്ടിരുന്നു.
ഹോട്ടലിലെ സിസിടിവി ദൃശ്യങ്ങള്‍ പരിശോധിച്ച് ഇത് ജാസിക് അലിയാണെന്ന് സ്ഥിരീകരിച്ചു. തുടര്‍ന്ന് വിശദമായി പരിശോധന നടത്തുകയായിരുന്നു.