ആശുപത്രിക്കകത്തും തെരുവുനായ ആക്രമണം. വിഴിഞ്ഞത്ത് ആശുപത്രിക്കകത്ത് വെച്ച് പെണ്‍കുട്ടിയ്ക്ക് തെരുവുനായയുടെ കടിയേറ്റു. ചപ്പാത്ത് സ്വദേശി അപര്‍ണ (31) യുടെ കാലിലാണ് തെരുവുനായ കടിച്ചത്. പൂച്ച കടിച്ചതിന് കുത്തിവയ്‌പ്പെടുക്കാന്‍ എത്തിയപ്പോഴാണ് നായ കടിച്ചത്.
ചാലക്കുടിയില്‍ തെരുവ് നായ്കള്‍ ചത്തനിലയില്‍; വിഷം കൊടുത്ത് കൊന്നതെന്ന് സംശയം
തൃശൂര്‍ ചാലക്കുടിയില്‍ തെരുവ് നായ്കളെ ചത്ത നിലയില്‍ കണ്ടെത്തി. ചാലക്കുടി താലൂക്ക് ആശുപത്രി പരിസരത്താണ് മൂന്ന് നായ്കളുടെ ജഡം കണ്ടെത്തിയത്. ഇവയെ വിഷം കൊടുത്ത് കൊന്നതാണെന്ന് സംശയമുണ്ട്. ജഡത്തിന്റെ സമീപത്തുനിന്ന് കേക്കിന്റെ അവശിഷ്ടങ്ങള്‍ കണ്ടെത്തിയിട്ടുണ്ട്.
കൊച്ചി നഗരസഭ തെരുവ് നായ്കളുടെ വാക്സിനേഷന്‍ ഊര്‍ജിതപ്പെടുത്തുന്നതിന്റെ ഭാഗമായി ഫോര്‍ട്ട്കൊച്ചി ബീച്ച് പരിസരത്ത് തെരുവുനായ്കള്‍ക്ക് മെഗാ വാക്സിനേഷന്‍ ഡ്രൈവ് സംഘടിപ്പിച്ചു. 71 തെരുവ് നായ്കളെ പിടികൂടി വാക്സിനേറ്റ് ചെയ്തു. ഇതില്‍ വന്ധ്യംകരിച്ചിട്ടില്ലാത്ത 13 നായ്കളെ ബ്രഹ്മപുരത്തേക്ക് മാറ്റി.
വാക്സിനേഷന്‍ ഡ്രൈവിന്റെ ഭാഗമായി കൊച്ചി നഗരസഭയുടെ നാലു മൃഗാശുപത്രിയുടെ കീഴില്‍ 40 ഇടങ്ങളിലായി തെരുവ് നായ്കള്‍ക്ക് വാക്സിനേഷന്‍ സൗകര്യം ഒരുക്കും. മൃഗസ്നേഹികളായ സന്നദ്ധ പ്രവര്‍ത്തകരുടെ കൂടി സഹായത്തോടെയാണ് വാക്സിനേഷനായി നായ്കളെ പിടികൂടുന്നത്.