ഐഎഫ്എഫ്‌കെ സമാപന വേദിയില്‍ ചലച്ചിത്ര അക്കാദമി ചെയര്‍മാനും സംവിധായകനുമായ രഞ്ജിത്തിന് പ്രതിനിധികളുടെ കൂവല്‍ . സ്വാഗത പ്രസംഗത്തിനെത്തിയപ്പോഴായിരുന്നു കൂവിയത്.താന്‍ സംസാരിക്കാന്‍ വരുമ്പോള്‍ കൂവാന്‍ കുറച്ച് പേര്‍ തയ്യാറായി നില്‍ക്കുന്നുണ്ടെന്ന് ഒരു മാധ്യമസുഹൃത്ത് പറഞറിഞ്ഞിരുന്നു. വളരെ നല്ല കാര്യമെന്നാണ് താന്‍ പറഞ്ഞത്.കൂവി തെളിയുക തന്നെ വേണം. ഭാര്യയുമായിട്ടാണ് ഞാന്‍ ഈ ചടങ്ങിന് വന്നത് നമുക്കത് ഒരുമിച്ചാസ്വാദിക്കാമെന്നാണ് താന്‍ ഭാര്യയോട് പറഞ്ഞതെന്നും അദ്ദേഹം വെളിപ്പെടുത്തി.
‘കൂവല്‍ ഒന്നും പുത്തരിയല്ല. 1976ല്‍ എസ്എഫ്‌ഐയില്‍ തുടങ്ങിയതാണ് ജീവിതം. അതുകൊണ്ട് ഇതൊന്നും ഒരു വിഷയമൊന്നും അല്ല. അതിന് ആരും ശ്രമിച്ച് പരാജയപ്പെടുകയും വേണ്ട. മമ്മൂട്ടി അഭിനയിക്കുന്ന ചിത്രത്തിന് ടിക്കറ്റ് കിട്ടാത്തതിന് ആരൊക്കെയോ എന്തൊക്കെയോ പറഞ്ഞു. മമ്മൂട്ടി അഭിനയിച്ച സിനിമ തിയേറ്ററുകളില്‍ വരും. അപ്പോള്‍ എത്രപേര്‍ കാണാനുണ്ടാവുമെന്ന് നമുക്ക് കാണാം’ ഇതായിരുന്നു രജ്ഞിത്തിന്റെ മറുപടി .
ലിജോ ജോസ് പെല്ലിശ്ശേരിയുടെ നന്‍പകല്‍ നേരത്ത് മയക്കം എന്ന സിനിമയുടെ പ്രദര്‍ശത്തിനിടെ പ്രതിനിധികളുടെ പ്രതിഷേധം ഉയര്‍ന്നിരുന്നു. സീറ്റ് കിട്ടാതെ പോയതിനും നടത്തിപ്പിലെ പരാതിയും ഓണ്‍ലൈന്‍ ബുക്കിങ്ങിലെ പരാതിയുമൊക്കെ ചൂണ്ടിക്കാട്ടി ആയിരുന്നു പ്രതിഷേധം ഇത്തരത്തില്‍ പ്രതിഷേധിച്ചവരെ പൊലീസ് അറസ്റ്റ് ചെയ്തിരുന്നു. ഇതിനെതിരെയാണ് ചെയര്‍മാന്‍ രഞ്ജിത്തിനെതിരെ കാണികള്‍ കൂവല്‍ നടത്തിയത്.