ഇടുക്കി ജില്ലയിലെ മഞ്ഞപ്രയില്‍ യുവതിയ്ക്ക് നേരെ ആസിഡ് ആക്രമണം. തൊടുപുഴ സ്വദേശിയായ സോനയ്ക്ക് നേരെ ഇന്ന് രാവിലെയാണ് ആക്രമണം ഉണ്ടായത്.
സോനയുടെ മുന്‍ ഭര്‍ത്താവ് രാഹുലാണ് ആസിഡ് ആക്രമണം നടത്തിയത്. ഗുരുതരമായി പരിക്കേറ്റ സോനയെ കോട്ടയം മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്.
കുടുംബ പ്രശ്‌നത്തെ തുടര്‍ന്ന് കഴിഞ്ഞ മൂന്ന് ദിവസമായി സോന സുഹൃത്തായ ഷാരോണിന്റെ വീട്ടിലാണ് താമസിച്ചിരുന്നത്. മുന്‍ ഭര്‍ത്താവായ രാഹുല്‍ ഇവിടെ എത്തി സോനയെ വീട്ടില്‍ നിന്ന് വലിച്ചിറക്കി ആസിഡ് ഒഴിക്കുകയായിരുന്നു. വിവാഹ ബന്ധം വേര്‍പെടുത്തിയതിന് ശേഷവും രാഹുല്‍ സോനയെ ശല്യപ്പെടുത്തുമായിരുന്നു.
സംഭവത്തില്‍ മുട്ടം പൊലീസാണ്് കേസെടുത്തിരിക്കുന്നത്. പ്രതിയെ കസ്റ്റഡിയില്‍ എടുത്തിട്ടുണ്ട്. പരിക്കേറ്റ സോനയെ ആദ്യം തൊടുപുഴ ജില്ലാ ആശുപത്രിയില്‍ പ്രവേശിപ്പിക്കുകയായിരുന്നു. തുടര്‍ന്നാണ് കോട്ടയത്തേക്ക് മാറ്റിയത്.