സംസ്ഥാനത്ത് മന്ത്രി സഭയില്‍ വീണ്ടും മാറ്റങ്ങള്‍. എന്‍സിപിയുടെ എകെ ശശീന്ദ്രന് മന്ത്രി സ്ഥാനം ഒഴിയും. വനം-വന്യജീവി വകുപ്പ് മന്ത്രിയായിരുന്നു എകെ ശശീന്ദ്രന്. എന്‍സിപി ദേശീയ അധ്യക്ഷന്‍ വിളിച്ച യോഗത്തിലാണ് എകെ ശശീന്ദ്രന് പകരം തോമസ് കെ തോമസിന് മന്ത്രി സ്ഥാനം നല്‍കാന്‍ തീരുമാനമായത്. ശരദ് പവാറിന്റെ തീരുമാനത്തോട് യോജിക്കുന്നുവെന്ന് എ കെ ശശീന്ദ്രന് വ്യക്തമാക്കി.
പാര്‍ട്ടിയിലെ മന്ത്രി മാറ്റവുമായി ബന്ധപ്പെട്ട് പാര്‍ട്ടി അധ്യക്ഷന്‍ പിസി ചാക്കോ മുഖ്യമന്ത്രിയ്ക്കും എ കെ ശശീന്ദ്രനും തോമസ് കെ തോമസിനും കത്ത് നല്‍കിയിരുന്നു. രണ്ടര വര്‍ഷം എകെ ശശീന്ദ്രന് മന്ത്രി സ്ഥാനം പൂര്‍ത്തിയാക്കിയ സാഹചര്യത്തില്‍ സ്ഥാനം ഒഴിയണം എന്ന് ആവശ്യപ്പെട്ടായിരുന്നു കത്ത്. വിഷയത്തില്‍ ഇടപെടില്ലെന്നും തീരുമാനം എന്‍സിപിയുടേതാണെന്നുമാണ് മുഖ്യമന്ത്രിയുടെ നിലപാട്.
അതേസമയം ദേശീയ അധ്യക്ഷന്റെ നേതൃത്വത്തില്‍ ചേര്‍ന്ന യോഗത്തില്‍ ജില്ലാ നേതൃത്വങ്ങള്‍ ശശീന്ദ്രനെതിരെ നിലപാടെടുത്തിരുന്നു. ഇതുകൂടാതെ സംസ്ഥാന നേതൃത്വവും ശശീന്ദ്രനെ പിന്തുണച്ചില്ല. ഈ സാഹചര്യത്തിലാണ് മന്ത്രി സ്ഥാനം ഒഴിയാന്‍ ശശീന്ദ്രന് തയ്യാറായത്.
മുഖ്യമന്ത്രിയുമായി ഇത് സംബന്ധിച്ച് എകെ ശശീന്ദ്രന് കൂടിക്കാഴ്ച നടത്തിയിരുന്നു. പാര്‍ട്ടി തീരുമാനം അംഗീകരിക്കുന്നതായി എകെ ശശീന്ദ്രനും അറിയിച്ചിട്ടുണ്ട്. എന്നാല്‍ ഇത് സംബന്ധിച്ച പ്രഖ്യാപനം ഒരാഴ്ചയ്ക്കുള്ളില്‍ ഉണ്ടാകുമെന്നാണ് പുറത്ത് വരുന്ന റിപ്പോര്‍ട്ടുകള്‍. ഇതിന് പിന്നാലെ ശശീന്ദ്രനും തോമസ് കെ തോമസും തമ്മില്‍ കൂടിക്കാഴ്ച നടത്തി.