ആലത്തൂര്‍ മണ്ഡലത്തില്‍ യു.ഡി.എഫ് സ്ഥാനാര്‍ത്ഥി രമ്യ ഹരിദാസിന്റെ അട്ടിമറി മുന്നേറ്റം. ഒരു ലക്ഷത്തിന് മുകളില്‍ വോട്ടുകളുടെ ലീഡാണ് രമ്യയ്ക്ക് ഇപ്പോള്‍ ഉള്ളത്. ഇടത് കോട്ടകളിലും വന്‍ നേട്ടം ഉണ്ടാക്കിയാണ് രമ്യ ഹരിദാസിന്റെ കുതിപ്പ്. എല്‍.ഡി.എഫ് സ്ഥാനാര്‍ത്ഥി പി.കെ ബിജു രണ്ടാമതുള്ളപ്പോള്‍ എന്‍ഡിഎയുടെ ടി.വി ബാബു മൂന്നാമതാണ്.
ഇതു ജനം തന്ന വിജയമെന്നാണ് രമ്യയുടെ മാധ്യമങ്ങളോടുള്ള ആദ്യ പ്രതികരണം. അട്ടിമറി വിജയം പ്രതീക്ഷിച്ചിരുന്നെന്നും ജനങ്ങള്‍ക്ക് നന്ദി പറയുന്നതായും രമ്യ പറഞ്ഞു. ഒടുവില്‍ വിവരം ലഭിക്കുമ്പോള്‍ 1,12,896 വോട്ടുകളുടെ ലീഡാണ് രമ്യയ്ക്ക് ഉള്ളത്. 3,93,357 വോട്ടുകള്‍ രമ്യ നേടി. എല്‍ഡിഎഫിന്റെ പി.കെ ബിജു 2,80,461 വോട്ടുകള്‍ നേടിയപ്പോള്‍ എന്‍ഡിഎയുടെ ടി.വി ബാബു 69,117 വോട്ടുകളാണ് നേടിയിരിക്കുന്നത്.
പാലക്കാട് തൃശൂര്‍ ജില്ലകളിലായി കിടക്കുന്ന ആലത്തൂര്‍ മണ്ഡലത്തില്‍ ഇടതു കോട്ടകളിലെല്ലാം രമ്യയാണ് മുന്നേറുന്നത്. എല്‍ഡിഎഫ് സ്ഥാനാര്‍ത്ഥിയും സിറ്റിംഗ് എംപിയുമായ സിപിഎമ്മിലെ പികെ ബിജുവിനെതിരെ രമ്യ അട്ടിമറി വിജയം നേടുമെന്ന് സര്‍വേകളും പ്രവചിച്ചിരുന്നു.
