ആയുര്‍വേദ മസാജ് സെന്ററുകള്‍ കഴിഞ്ഞ കുറച്ച് ദിവസങ്ങളായി വാര്‍ത്തകളില്‍ ഇടം പിടിക്കുന്നുണ്ട്. പുറമേ ആയുര്‍വേദ മസാജിന്റെ പേരില്‍ പ്രവര്‍ത്തിക്കുന്ന ഇത്തരം സ്ഥാപനങ്ങളില്‍ നടക്കുന്ന നിയമവിരുദ്ധ പ്രവര്‍ത്തനങ്ങളാണ് മാധ്യമങ്ങളില്‍ വാര്‍ത്തയാകുന്നത്. കഴിഞ്ഞ ദിവസങ്ങളില്‍ എറണാകുളത്തെ ചില മസാജ് സെന്ററുകള്‍ കേന്ദ്രീകരിച്ച് നടക്കുന്ന സെക്‌സ് റാക്കറ്റുകളുടെ പ്രവര്‍ത്തനമാണ് വാര്‍ത്തകളില്‍ ഇടം പിടിച്ചത്.
ഇടപ്പള്ളി കേന്ദ്രീകരിച്ച് പ്രവര്‍ത്തിച്ചിരുന്ന മന ആയുര്‍വേദിക് മസാജ് പാര്‍ലറിന്റെ മറവില്‍ നടന്നത് പക്ഷേ രാസ ലഹരി കച്ചവടമായിരുന്നു. എറണാകുളം എക്‌സൈസ് സ്‌പെഷ്യല്‍ സ്‌ക്വാഡാണ് മിന്നല്‍ പരിശോധനയില്‍ ഇവിടെ നിന്ന് 50 ഗ്രാം ഗോള്‍ഡന്‍ മെത്ത് പിടികൂടിയത്. കണ്ണൂര്‍ സ്വദേശി അഷ്‌റഫ്, സഹോദരന്‍ അബൂബക്കര്‍, പറവൂര്‍ സ്വദേശി സിറാജുദ്ദീന്‍ എന്നിവര്‍ കേസില്‍ പിടിയിലായി.
സിഗരറ്റ് പാക്കറ്റുകളില്‍ ചെറിയ അളവുകളിലായാണ് രാസ ലഹരി കച്ചവടം ചെയ്തിരുന്നത്. മസാജിനെത്തിയിരുന്നവരെയും യുവാക്കളെയും ലക്ഷ്യമിട്ടാണ് ലഹരി വ്യാപാരം നടത്തി വന്നിരുന്നത്.