കേന്ദ്ര സര്‍ക്കാരിനെയും കോണ്‍ഗ്രസിനെയും രൂക്ഷമായി വിമര്‍ശിച്ച് മുഖ്യമന്ത്രി പിണറായി വിജയന്‍. കോണ്‍ഗ്രസ് തുടങ്ങിവെച്ച നയങ്ങളുടെ മൂര്‍ദ്ധന്യാവസ്ഥയാണ് ഇപ്പോള്‍ കേന്ദ്ര സര്‍ക്കാര്‍ നടപ്പാക്കുന്നതെന്ന് മുഖ്യമന്ത്രി പറഞ്ഞു. ഉദാരവത്കരണം ഉള്‍പ്പടെയുള്ള നയങ്ങള്‍ കൊണ്ടുവന്നത് തെറ്റായെന്ന് കോണ്‍ഗ്രസിന് തോന്നുന്നുണ്ടോയെന്നും മുഖ്യമന്ത്രി ചോദിച്ചു.
സിപിഎം മലപ്പുറം ജില്ലാ സമ്മേളനത്തില്‍ സംസാരിക്കുകയായിരുന്നു പിണറായി. ബിജെപിക്കും കോണ്‍ഗ്രസിനും ഒരേ സാമ്പത്തിക നയമാണ്. കോണ്‍ഗ്രസ് ഭരിക്കുന്ന സംസ്ഥാനങ്ങളില്‍ ബിജെപി നയമാണ് നടപ്പാക്കുന്നത്. കേന്ദ്രസര്‍ക്കാരിന് എതിരായ ജനവികാരം തിരിച്ചു വിടാന്‍ വര്‍ഗീയ സംഘര്‍ഷം ഉണ്ടാക്കുന്നുവെന്നും പിണറായി കുറ്റപ്പെടുത്തി.
ഭൂരിപക്ഷ വര്‍ഗീയതക്ക് ന്യുനപക്ഷ വര്‍ഗീയത മരുന്നല്ലെന്നും രണ്ടും പരസ്പരപൂരകമെന്നും മുഖ്യമന്ത്രി അഭിപ്രായപ്പെട്ടു. അമിത് ഷായ്ക്ക് ഡോ ബിആര്‍ അംബേദ്കറോട് പുച്ഛമാണ്. സംഘപരിവാര്‍ അക്രമങ്ങളില്‍ മുസ്ലിം വിഭാഗങ്ങളാണ് ഏറ്റവുമധികം ഇരകളായത്. ക്രൈസ്തവരുടെ സ്ഥിതിയും വ്യത്യസ്തമല്ലെന്നും പിണറായി വിജയന്‍ കൂട്ടിച്ചേര്‍ത്തു.
വിട്ടുവീഴ്ചയില്ലാതെ വര്‍ഗീയതയെ നേരിടുന്ന പാര്‍ട്ടിയാണ് കോണ്‍ഗ്രസ് എന്ന് അവര്‍ക്ക് പറയാനാകുമോയെന്ന് ചോദിച്ച മുഖ്യമന്ത്രി കോണ്‍ഗ്രസ് നേതാക്കളും അണികളും ബിജെപിക്ക് ഒപ്പം പോകുന്നുവെന്നും ആരോപിച്ചു. വര്‍ഗീയതുടെ ആടയാഭരണങ്ങള്‍ അണിഞ്ഞ ഒരുപാട് കോണ്‍ഗ്രസ് നേതാക്കളുണ്ടെന്നും പിണറായി പറഞ്ഞു.