കോടതി വിധിയ്‌ക്കെതിരെ സമരക്കാര്‍ പണിമുടക്കില്‍ നിന്ന് പിന്മാറില്ലെന്ന് സിഐടിയു സംസ്ഥാന പ്രസിഡന്റും സിപിഐഎം തിരുവനന്തപുരം ജില്ലാ സെക്രട്ടറിയുമായ ആനത്തലവട്ടം ആനന്ദന്‍. പണിമുടക്കേണ്ടെന്ന് ഹൈക്കോടതി പറഞ്ഞാല്‍ ആരെങ്കിലും അനുസരിക്കുമോ എന്ന് ചോദിച്ച ആനത്തലവട്ടം പണിയെടുക്കാനുള്ള അവകാശം പോലെ തന്നെ പണി മുടക്കാനും അവകാശമുണ്ടെന്നും പറഞ്ഞു. എനിക്കിന്ന് പണിയെടുക്കാന്‍ മനസ്സില്ല. പണിയെടുക്കണം എന്ന് നിര്‍ബന്ധിക്കാന്‍ കോടതിയ്ക്ക് എന്താണ് കാര്യമെന്നും അത് വിലപ്പോവില്ലെന്നും അദ്ദേഹം പറഞ്ഞു.
അതേസമയം, സംസ്ഥാനത്തെ മുഴുവന്‍ കടകളും ഇന്ന് തുറക്കുമെന്ന് വ്യാപാരി വ്യവസായി ഏകോപന സമിതി അറിയിച്ചിരുന്നു. പണിമുടക്കില്‍ കടകള്‍ മാത്രം അടച്ചിടേണ്ട കാര്യമില്ലെന്ന് വ്യാപാരി വ്യവസായി സമിതി സംസ്ഥാന പ്രസിഡന്റ് പി കുഞ്ഞാവുഹാജി പറഞ്ഞു. സമരം പ്രഖ്യാപിച്ച ജീവനക്കാര്‍ തന്നെ ഇന്ന് ജോലിക്കു പോകുമ്പോള്‍ വ്യാപാരികള്‍ മാത്രം അടച്ചിടേണ്ടതില്ലെന്നും അദ്ദേഹം വ്യക്തമാക്കി.
കേന്ദ്ര സര്‍ക്കാറിന്റെ ജനദ്രോഹ നയങ്ങള്‍ക്ക് എതിരെ രാജ്യവ്യാപകമായി ട്രേഡ് യുണിയനുകള്‍ പ്രഖ്യാപിച്ച പണിമുടക്ക് രണ്ടാം ദിനത്തിലേക്ക് കടക്കുമ്പോള്‍ കേരളത്തില്‍ ആശക്കുഴപ്പം നിലനില്‍ക്കുന്നുണ്ട്. ഒന്നാം ദിനം പണിമുടക്കിനോട് പുര്‍ണമായ സഹകരിച്ച സംസ്ഥാനത്ത് ഹൈക്കോടതിയുടെ ഇടപെടലും, വ്യാപാരികളുടെ നിലപാടുമാണ് പണിമുടക്ക് അനുകൂലികള്‍ക്കിടയില്‍ ആശങ്കയുണ്ടാക്കുന്നത്.
Read more
കേന്ദ്ര ട്രേഡ് യൂണിയനുകളുടെയും സ്വതന്ത്ര ഫെഡറേഷനുകളുടെയും സംയുക്തവേദി ആഹ്വാനം ചെയ്ത ദ്വിദിന പണിമുടക്കിന്റെ ഒന്നാംനാള്‍ രാജ്യത്ത് 25 കോടി തൊഴിലാളികള്‍ പണിമുടക്കിയെന്നാണ് തൊഴിലാളി സംഘടനകള്‍ പറയുന്നത്.
