പാകിസ്ഥാനിലേക്ക് ആരൊക്കെ പോകണമെന്ന് എൻഡിഎ സ്ഥാനാർത്ഥി അനില്‍ ആന്‍റണി വ്യക്തമാക്കണമെന്ന് യുഡിഎഫ് സ്ഥാനാര്‍ത്ഥി ആന്‍റോ ആന്‍റണി. കോൺഗ്രസുകാർ രാജ്യംവിട്ട് പാകിസ്ഥാനിൽ പോകുന്നതാണ് നല്ലതെന്ന അനിൽ ആന്റണിയുടെ പരാമര്‍ശത്തിനെതിരെ പ്രതികരിക്കുകയായിരുന്നു ആന്‍റോ ആന്‍റണി.
‘അനിൽ ആന്‍റണി നിലപാട് വ്യക്തമാക്കണം. രാഹുൽ ഗാന്ധിയോട് ഒപ്പം അടിയുറച്ചു നിൽക്കുന്ന ഒട്ടേറെ മുതിർന്ന കോൺഗ്രസ് നേതാക്കൾ ഉണ്ട്. അവർ എല്ലാം പാകിസ്ഥാനിലേക്ക് പോകണം എന്നാണോ? എങ്കിൽ അത് ആരൊക്കെ എന്ന് കൂടി അനിൽ വ്യക്തമാക്കണം.കോൺഗ്രസ് പ്രചരണത്തിനു ആരൊക്കെ വരണം എന്ന് അനിൽ അഭിപ്രായം പറയേണ്ട ആവശ്യമില്ല. അനിലിന്‍റെ ജല്‍പനങ്ങൾ അവഗണിക്കുന്നു എന്നും ആന്‍റോ ആന്‍റണി പ്രതികരിച്ചു.
കോൺഗ്രസുകാർ രാജ്യംവിട്ട് പാകിസ്ഥാനിൽ പോകുന്നതാണ് നല്ലതെന്ന് ആയിരുന്നു പത്തനതിട്ടയിലെ എൻഡിഎ സ്ഥാനാർത്ഥി അനിൽ ആന്റണിയുടെ പരാമർശം. രാജ്യദ്രോഹിയായ ആന്‍റോ ആന്‍റണിക്ക് വേണ്ടി പത്തനംതിട്ടയിൽ വോട്ട് തേടാൻ എകെ ആന്‍റണി വരില്ലെന്നാണ് കരുതുന്നത്. നരേന്ദ്രമോദി പ്രചാരണത്തിന് എത്തിയ മണ്ഡലത്തിൽ ഇനി ആര് വന്നിട്ടും കാര്യമില്ലെന്നും അനിൽ ആന്‍റണി പറഞ്ഞിരുന്നു.
