നിപയില്‍ കേരളത്തിന് വീണ്ടും ആശ്വാസം. സംസ്ഥാനത്ത് എട്ടുപേരുടെ നിപ പരിശോധന ഫലങ്ങള്‍ കൂടി നെഗറ്റീവായതായി ആരോഗ്യ വകുപ്പ് മന്ത്രി വീണ ജോര്‍ജ്ജ് അറിയിച്ചു. ഇതോടെ ആകെ 66 സാമ്പിളുകള്‍ നെഗറ്റീവായി.പുതുതായി രണ്ട് പേരാണ് അഡ്മിറ്റായത്. നിലവില്‍ എട്ട് പേരാണ് രണ്ട് മെഡിക്കല്‍ കോളേജുകളിലായി ചികിത്സയിലുള്ളത്.
കോഴിക്കോട്, മഞ്ചേരി മെഡിക്കല്‍ കോളേജുകളിലാണ് നിലവില്‍ എട്ട് പേര്‍ ചികിത്സയിലുള്ളത്. വൈകുന്നേരം മലപ്പുറം കളക്ടറേറ്റില്‍ ചേര്‍ന്ന നിപ അവലോകന യോഗത്തില്‍ മന്ത്രി വീണ ജോര്‍ജ്ജ് ഓണ്‍ലൈനായി പങ്കെടുത്തു. നിലവില്‍ 472 പേരാണ് സമ്പര്‍ക്ക പട്ടികയിലുള്ളത്. ഇതില്‍ 220 പേരാണ് ഹൈറിസ്‌ക് കാറ്റഗറിയിലുള്ളത്.
പ്രതിരോധ പ്രവര്‍ത്തനങ്ങളുടെ ഭാഗമായി പാണ്ടിക്കാട്, ആനക്കയം പഞ്ചായത്തുകളിലെ ആരോഗ്യ പ്രവര്‍ത്തകരുടെ ഭവന സന്ദര്‍ശനം പൂര്‍ത്തിയാക്കി. ഇന്ന് 1477 വീടുകളില്‍ സന്ദര്‍ശനം നടത്തി. ആകെ 27908 വീടുകളില്‍ ഇതുവരെ സന്ദര്‍ശനം പൂര്‍ത്തിയായി. 227 പേര്‍ക്ക് ഇന്ന് മാനസികാരോഗ്യ സേവനങ്ങള്‍ നല്‍കി.
