പ്രിന്‍സിപ്പല്‍ നിയമനത്തില്‍ ഉന്നത വിദ്യാഭ്യാസമന്ത്രി ആര്‍ ബിന്ദു ഇടപെടല്‍ നടത്തിയെന്ന ആരോപണവുമായി സേവ് യൂണിവേഴ്സിറ്റി സമിതി രംഗത്ത്. യുജിസി അംഗീകൃത ജേര്‍ണലുകളില്‍ പ്രസിദ്ധീകരണങ്ങള്‍ ഇല്ലാത്തവരെയും പ്രിന്‍സിപ്പല്‍നിയമനത്തിന് പരിഗണിക്കണമെന്ന് ഉന്നത വിദ്യാഭ്യാസ മന്ത്രി വാക്കാല്‍ നിര്‍ദേശം നല്‍കിയെന്നാണ് ആരോപണം.
കോളേജ് വിദ്യാഭ്യാസ ഡയറക്ടറും പി.എസ്.സിയും തടഞ്ഞവര്‍ക്കായി വീണ്ടും ഹിയറിങ് നടത്തണമെന്നാണ് മന്ത്രി ആവശ്യപ്പെട്ടെതെന്നാണ് ആക്ഷേപം . ചട്ടപ്രകാരം ഇതു സാധ്യമല്ലെന്ന നിലപാടിലാണ് ഉന്നത വിദ്യാഭ്യാസ വകുപ്പിലെ ഉദ്യോഗസ്ഥരെന്നാണ് സൂചന.
മാര്‍ച്ച് മാസത്തിലാണ് പ്രിന്‍സിപ്പല്‍മാരുടെയും പ്രൊഫസര്‍മാരുടെയും സ്ഥാനക്കയറ്റത്തിനായി വിദഗ്ധസമിതി, യോഗ്യത പരിശോധനയും ഇന്റര്‍വ്യൂവും നടത്തിയത്. പ്രിന്‍സിപ്പല്‍ തസ്തികയ്ക്ക് 103 പേര്‍ അപേക്ഷിച്ചു, ഇതില്‍ നിന്ന് 43 പേരെയെ തിരഞ്ഞടുത്തുള്ളൂ. മറ്റുള്ളവര്‍ യുജിസി പറഞ്ഞിട്ടുള്ള യോഗ്യതകളില്ലാത്തതിനാലാണ് ഒഴിവാേക്കപ്പെട്ടത്.
ഇങ്ങനെ മാറ്റി നിറുത്തപ്പെട്ടവര്‍ക്കായി ഒന്നുകൂടി ഹിയറിംങ് നടത്തണമെന്ന് ഉന്നത വിദ്യാഭ്യാസ മന്ത്രി കോളജ് വിദ്യാഭ്യാസ ഡയറക്ടറോട് ആവശ്യപ്പെട്ടതായതാണ് സേവ്യൂണിവേഴ്‌സിറ്റി സമിതി ആരോപിക്കുന്നത്. യോഗ്യത പട്ടികയില്‍ അധ്യാപക സംഘടനാ പ്രതിനിധികള്‍ക്ക് കടന്നുകൂടുവാന്‍ കഴിയാത്തതുകൊണ്ട് അവര്‍ സര്‍ക്കാരില്‍ സമ്മര്‍ദം ചെലുത്തി യോഗ്യത നേടിയ 43 പേരുടെ നിയമനം തടയുകയാണെന്നും ആക്ഷേപമുണ്ട്.