സിപിഎം സംസ്ഥാന സെക്രട്ടറി എംവി ഗോവിന്ദനെ വെല്ലുവിളിച്ച് പാലക്കാട് യുഡിഎഫ് സ്ഥാനാര്‍ത്ഥി രാഹുല്‍ മാങ്കൂട്ടത്തില്‍. എംവി ഗോവിന്ദന്‍ പറഞ്ഞത് തന്നെ നുണ പരിശോധനയ്ക്ക് വിധേയമാക്കണമെന്നാണ്. ആ വെല്ലുവിളി താന്‍ ഏറ്റെടുക്കുന്നു. നുണ പരിശോധനയ്ക്ക് താന്‍ തയ്യാറാണെന്നും മാങ്കൂട്ടത്തില്‍ പറഞ്ഞു.
എന്നാല്‍ തന്നോടൊപ്പം നുണപരിശോധനയ്ക്ക് മന്ത്രി എംബി രാജേഷിനെയും എഎ റഹീമിനെയും നുണപരിശോധനയ്ക്ക് വിധേയമാക്കണമെന്ന് രാഹുല്‍ വെല്ലുവിളി ഉയര്‍ത്തി. പി സരിന്‍ പറഞ്ഞത് പാലക്കാട്ടെ ഹോട്ടല്‍ റെയ്ഡ് ഷാഫി പറമ്പിലിന്റെ നാടകമാണെന്നാണ്. അങ്ങനെയെങ്കില്‍ എംബി രാജേഷും റഹീമും തങ്ങളുടെ നാടകത്തിലെ നടന്മാരാണോയെന്നും രാഹുല്‍ ചോദിച്ചു.
ഇത്തരത്തില്‍ ഗോള്‍ പോസ്റ്റ് മാറ്റി മാറ്റി തങ്ങളെക്കൊണ്ട് ഗോളടിപ്പിക്കരുതെന്നും രാഹുല്‍ പരിഹസിച്ചു. നേരത്തെ രാഹുല്‍ മാങ്കൂട്ടത്തില്‍ തുടര്‍ച്ചയായി നുണ പറയുകയാണെന്ന് എംവി ഗോവിന്ദന്‍ ആരോപിച്ചിരുന്നു. കോണ്‍ഗ്രസും ബിജെപിയും പാലക്കാട് കള്ളപ്പണം ഒഴുക്കുന്നുവെന്നും കോണ്‍ഗ്രസ് നേതാക്കളെ നുണ പരിശോധനയ്ക്ക് വിധേയമാക്കണമെന്നും പറഞ്ഞിരുന്നു.