കെഎസ്ആർടിസി ബസിൽ യുവാവിൻറെ ആക്രമണം. യാത്രക്കാരനായ യുവാവ് സ്വയം ബ്ലേഡ് കൊണ്ട് ദേഹത്ത് മുറിവേൽപ്പിച്ചശേഷം വായിൽ ബ്ലേഡ് കടിച്ചുപിടിച്ച് മറ്റൊരു യാത്രക്കാരനെയും ആക്രമിച്ചു. ചേർത്തലയിൽ നിന്ന് മാനന്തവാടിക്ക് പോവുകയായിരുന്ന ബസ് തൃശൂർ തളിക്കുളത്ത് എത്തിയപ്പോഴാണ് യാത്രക്കാരൻറെ ആക്രമണം ഉണ്ടായത്. തളിക്കുളം സ്വദേശി ഫാസിലാണ് ആക്രമണം നടത്തിയത്.
കെഎസ്ആർടിസി ബസിൽ വെള്ളിയാഴ്‌ച്ച രാത്രിയോടെയായിരുന്നു സംഭവം. ബ്ലേഡ് കൊണ്ട് മുഖത്തും ദേഹത്തും സ്വയം മുറിവേൽപ്പിച്ച് ശേഷം ഫാസിൽ മറ്റൊരു യാത്രക്കാരനെ ആക്രമിച്ചത്. ആക്രമണത്തിന് ഇരയായത് ഗുരുവായൂർ മമ്മിയൂർ സ്വദേശി സാബു കെ ശങ്കരനാണ്. കഴുത്തിനും മുഖത്തിനും പരിക്കേറ്റ സാബുവിന് 43 സ്റ്റിച്ചുണ്ട്. സാബുവിൻറെ ഇരുചെവികൾക്കും മുറിവേറ്റിട്ടുണ്ട്. ഇരുവരെയും ഏങ്ങണ്ടിയൂർ എംഐ ആശുപത്രിയിലാണ് പ്രവേശിപ്പിച്ചത്.
അക്രമി ബസിൻറെ മുൻവശത്തെയും ഡോറിന് മുകളിലത്തെയും ചില്ലും തകർത്തു. തൃപ്രയാറിൽ നിന്നും ബസിൽ കയറിയതായിരുന്നു സാബു. തളിക്കുളം പത്താംകല്ലിൽ നിന്നാണ് ഫാസിൽ ബസിൽ കയറിയത്. സ്ത്രീകളുടെ സീറ്റിലിരുന്ന ഇയാളോട് പിറകിലേക്ക് മാറിയിരിക്കണമെന്ന് ആവശ്യപ്പെട്ട കണ്ടക്ടറെ ഇയാൾ ഭീഷണിപ്പെടുത്തുകയും തുടർന്ന് ആക്രമണം നടത്തുകയായിരുന്നുവെന്നുമാണ് വിവരം. സംഭവത്തിൽ ഫാസിലിനെതിരെ വാടാനപ്പിള്ളി പൊലീസ് കേസെടുത്തു.
