തിരുവനന്തപുരത്ത് മുന്‍ ഭര്‍ത്താവ് നഗ്ന ചിത്രങ്ങള്‍ പ്രചരിപ്പിച്ചതില്‍ മനംനൊന്ത് വീട്ടമ്മ ആത്മഹത്യ ചെയ്തു. വട്ടിയൂര്‍ക്കാവ് മണികണ്‌ഠേശ്വരത്ത് ശ്രീജിതാ ഭവനില്‍ ശ്രീജയാണ് ആത്മഹത്യ ചെയ്തത്. പ്രതി ശ്രീജിത്ത് ശ്രീജയെ മര്‍ദ്ദിച്ച് അവശയാക്കിയ ശേഷം നഗ്ന ചിത്രങ്ങള്‍ പകര്‍ത്തി പ്രചരിപ്പിക്കുകയായിരുന്നു.
ശ്രീജയുടെ ആത്മഹത്യ കുറിപ്പില്‍ മുന്‍ ഭര്‍ത്താവിന്റെ അതിക്രമങ്ങളെ കുറിച്ച് സൂചനയുണ്ടെന്ന് പൊലീസ് പറയുന്നു. പോക്‌സോ കേസ് പ്രതിയാണ് ശ്രീജിത്ത്. 2021ല്‍ ശ്രീജിത്ത് പോക്‌സോ കേസില്‍ പ്രതിയായതിന് പിന്നാലെ ശ്രീജ ഇയാളില്‍ നിന്ന് പിരിഞ്ഞ് താമസിക്കുകയായിരുന്നു. അഞ്ച് ദിവസങ്ങള്‍ക്ക് മുന്‍പ് ഇരുവരും വിവാഹ മോചനം നേടിയിരുന്നു.
ജൂണ്‍ 24ന് ശ്രീജയുടെ വീട്ടിലെത്തിയ ശ്രീജിത്ത് ഇവരോട് വീട്ടില്‍ നിന്നും ഒഴിയണമെന്നും തന്റെ പേരില്‍ വീടിന്റെ ആധാരം രജിസ്റ്റര്‍ ചെയ്ത് നല്‍കണമെന്നും അറിയിച്ചു. ശ്രീജ ഇത് വിസമ്മതിച്ചതോടെ പ്രതി ആക്രമിക്കുകയായിരുന്നു. പ്രതിയുടെ ആക്രമണത്തില്‍ അവശനിലയിലായ ശ്രീജയുടെ വസ്ത്രങ്ങള്‍ കീറിയെറിഞ്ഞാണ് ഇയാള്‍ നഗ്ന ചിത്രങ്ങള്‍ പകര്‍ത്തിയത്.
Read more
തുടര്‍ന്ന് ചിത്രങ്ങള്‍ സമീപവാസിയായ നിരവധി ക്രിമിനല്‍ കേസുകളിലെ പ്രതിയ്ക്ക് അയച്ചു നല്‍കി. വീട് തന്റെ പേരില്‍ രജിസ്റ്റര്‍ ചെയ്ത് നല്‍കിയില്ലെങ്കില്‍ ചിത്രങ്ങള്‍ പ്രചരിപ്പിക്കുമെന്നായിരുന്നു പ്രതിയുടെ ഭീഷണി. ഇതില്‍ മനംനൊന്ത ശ്രീജ ജീവനൊടുക്കുകയായിരുന്നു.
