നവകേരള സദസുമായി ബന്ധപ്പെട്ട് കാസർഗോഡ് ജില്ലാ കളക്ടർ ഇറക്കിയ ഉത്തരവിനെ വിമർശിച്ച് ബിജെപി. പരിപാടിയിലേക്ക് ആളെ കൂട്ടുന്നതിന് വേണ്ടിയാണ് ഉത്തരവെന്നാണ് വിമർശനം. എല്ലാ സർക്കാർ ജീവനക്കാരും നവകേരള സദസിൽ പങ്കെടുക്കണമെന്നായിരുന്നു കളക്ടറുടെ ഉത്തരവ്.
പരിപാടി പൊളിയാതിരിക്കാനുള്ള അടവാണിതെന്നും സർക്കാർ നിർദേശപ്രകാരമാണ് കളക്ടർ ഉത്തരവിറക്കിയതെന്നും ബിജെപി സംസ്ഥാന സെക്രട്ടറി കെ ശ്രീകാന്ത്‌ ആരോപിച്ചു. സർക്കാർ നിർദേശമല്ല. കളക്ടർ എന്ന നിലയിൽ സ്വന്തമായി എടുത്ത തീരുമാനമാണെന്നും, തീരുമാനത്തിന്റെ പോസിറ്റീവായ വശം മനസിലാക്കണമെന്നും കാസർഗോഡ് കളക്ടർ കെ ഇമ്പശേഖർ പറഞ്ഞു. ഉത്തരവുമായി മുന്നോട്ടുപോകുമെന്നും അദ്ദേഹം അറിയിച്ചു.
നവംബർ 18, 19 തീയതികളിലാണ് കാസർഗോഡ് നവ കേരള സദസ് നടക്കുന്നത്. അതത് മണ്ഡലത്തിലെ ഉദ്യോഗസ്ഥരാണ് പരിപാടിയിൽ പങ്കെടുക്കേണ്ടത്. ഞായറാഴ്ച പ്രവർത്തി ദിവസമാക്കിയാണ് കളക്ടർ ഉത്തരവിറക്കിയിരിക്കുന്നത്. പങ്കെടുക്കാൻ ഡ്യൂട്ടി നൽകിക്കൊണ്ട് വകുപ്പ് ജില്ലാ മേധാവി ഉത്തരവിറക്കണമെന്നും എല്ലാ ജീവനക്കാരും പങ്കെടുക്കുന്നു എന്ന് ഉറപ്പുവരുത്തണമെന്നും വകുപ്പ് ജില്ലാ മേധാവികൾക്ക് നിർദേശം നൽകിയാണ് ഉത്തരവ്.