ഇന്ത്യയിലെ മറ്റ് സംസ്ഥാനങ്ങളില് ബിജെപിക്ക് ലഭിച്ചുകൊണ്ടിരിക്കുന്നത് പോലെയുള്ള വിജയം ആവര്ത്തിക്കണമെന്ന് കേരളത്തിലെ ബിജെപി നേതാക്കള്ക്ക് പ്രധാനമന്ത്രി നരേന്ദ്ര മോഡിയുടെ നിര്ദ്ദേശം. ഓഖി ദുരന്ത ബാധിതരെ സന്ദര്ശിക്കാന് കേരളത്തിലെത്തിയ സമയത്ത് ബിജെപി സംസ്ഥാന ഭാരവാഹികളുടെയും മോര്ച്ചാ നേതാക്കളുടെയും യോഗത്തില് പങ്കെടുത്ത് സംസാരിക്കുകയായിരുന്നു അദ്ദേഹം.
കേന്ദ്രസര്ക്കാര് ജനങ്ങള്ക്കായി ചെയ്യുന്ന പദ്ധതികളുടെ വിശദാംശങ്ങളും അതുകൊണ്ടുള്ള പ്രയോജനങ്ങളും ജനങ്ങളിലേക്ക് എത്തിക്കാനുള്ള സംവിധാനം സംസ്ഥാന പാര്ട്ടി നേതൃത്വം കൈക്കൊള്ളണം. പാര്ട്ടിയുടെ താഴേതട്ട് മുതല് മുകള്തട്ടു വരെ അതിനായി പ്രത്യേക സംഘങ്ങള് ഉണ്ടാക്കണമെന്നും മോഡി ആവശ്യപ്പെട്ടു.
ഓഖി ദുരിതാശ്വാസ പ്രവര്ത്തനങ്ങളില് സജീവമായി ഇടപെടാന് അദ്ദേഹം ബിജെപി പ്രവര്ത്തകരോട് ആവശ്യപ്പെട്ടു. കേന്ദ്രസര്ക്കാരിന്റെ ഭാഗത്തുനിന്ന് ദുരിതാശ്വാസ പ്രവര്ത്തനങ്ങള്ക്കുള്ള സഹായങ്ങള് തുടരുമെന്നും അദ്ദേഹം വാഗ്ദാനം ചെയ്തു.
Read more
തിരുവനന്തപുരത്തെ ഗസ്റ്റ് ഹൗസില് നടന്ന യോഗത്തില് കേന്ദ്രമന്ത്രി അല്ഫോണ്സ് കണ്ണന്താനം, സംസ്ഥാന അധ്യക്ഷന് കുമ്മനം രാജശേഖരന്, ഒ. രാജഗോപാല് എംഎല്എ തുടങ്ങിയവര് സംസാരിച്ചു. ദേശീയ നിര്വാഹക സമിതി അംഗം വി. മുരളീധരന് മോഡിയുടെ പ്രസംഗം പരിഭാഷപ്പെടുത്തി.