കേരള ആര്‍ടിസിയെ തകര്‍ക്കാനുള്ള ഇടതുപക്ഷ സര്‍ക്കാരിന്റെ അടവുനയമാണ് റോബിന്‍ ബസിന്റെ മറവില്‍ അരങ്ങേറുന്നതെന്ന് കേരള സ്റ്റേറ്റ് ട്രാന്‍സ്പോര്‍ട്ട് എംപ്ലോയീസ് സംഘ് (ബിഎംഎസ്.).
റോബിന്‍ ബസിന്റെ മറവില്‍ സംസ്ഥാന റൂട്ടുകള്‍ സ്വകാര്യവത്കരിക്കാനുള്ള ശ്രമമാണ് നടക്കുന്നത്. നിയമം ലംഘിക്കുന്ന ബസ് പിടിച്ചെടുക്കുന്നതിനു പകരം വഴിനീളെ പ്രഹസന പരിശോധന നടത്തുകയാണ്. ആര്‍ടിസികള്‍ക്ക് അവകാശപ്പെട്ട അന്തര്‍സംസ്ഥാന പാതകളില്‍ കൂടുതല്‍ ബസുകള്‍ ഓടിക്കാന്‍ കെഎസ്ആര്‍ടിസി തയ്യാറാകണമെന്ന് സംഘ് ജനറല്‍ സെക്രട്ടറി എസ് അജയകുമാര്‍, വൈസ് പ്രസിഡന്റ് കെ രാജേഷ് എന്നിവര്‍ ആവശ്യപ്പെട്ടു.
എന്നാല്‍, സഹകരണ ബാങ്കുകള്‍ നഷ്ടത്തിലാണെന്നുപറഞ്ഞ് ഇനി എസ്ബിഐ പ്രവര്‍ത്തനം പൂട്ടിക്കെട്ടാന്‍ സംസ്ഥാന സര്‍ക്കാര്‍ നിര്‍ദേശം നല്‍കുമോയെന്ന് റോബിന്‍ ബസ് ഉടമ ബേബി ഗിരീഷ് ചോദിച്ചു. എന്റെ ബസ് പിടിച്ചെടുക്കരുതെന്ന് സര്‍ക്കാര്‍ നിര്‍ദേശമുണ്ട്.
എന്നാല്‍, പലയിടത്തും ബസ് തടഞ്ഞ് പിഴ ഈടാക്കി വേട്ടയാടല്‍ തുടരുകയാണ്. ദിവസവും പതിനായിരക്കണക്കിന് രൂപ പിഴ ഈടാക്കി തന്നെ തളര്‍ത്താനാണ് ശ്രമം. കെ.എസ്.ആര്‍.ടി.സിക്ക് നഷ്ടം വരുമെന്ന് പറഞ്ഞ് മറ്റുള്ളവരെ കേരളത്തില്‍ പ്രവര്‍ത്തിക്കാന്‍ അനുവദിക്കാത്ത സാഹചര്യമാണുള്ളത്.
സര്‍ക്കാര്‍ വേട്ടയാടുകയാണെന്നും അദേഹം പറഞ്ഞു. നിയമാനുസൃതം സംരംഭങ്ങള്‍ തുടങ്ങാന്‍ കേരളത്തില്‍ കഴിയുന്നില്ല. എന്ത് പ്രകോപനം സൃഷ്ടിച്ചാലും ഗാന്ധിയന്‍ മാര്‍ഗത്തില്‍ മാത്രമായിരിക്കും പോരാട്ടമെന്നും ഗിരീഷ് പറഞ്ഞു. മഹാത്മാഗാന്ധി നാഷനല്‍ ഫൗണ്ടേഷന്‍ ഏര്‍പ്പെടുത്തിയ ശ്രേഷ്ഠകര്‍മ പുരസ്‌കാരം ഏറ്റുവാങ്ങിയശേഷം സംസാരിക്കുകയായിരുന്നു അദ്ദേഹം.