ബഫര്‍ സോണില്‍ സമരം പ്രഖ്യാപിച്ച് താമരശ്ശേരി രൂപത. കര്‍ഷകരെ ബാധിക്കാതെ അതിര്‍ത്തി നിശ്ചയിക്കണമെന്നും ഉപഗ്രഹസര്‍വേ റിപ്പോര്‍ട്ട് പിന്‍വലിക്കണമെന്നും താമരശ്ശേരി രൂപത ആവശ്യപ്പെട്ടു.
വിഷയത്തില്‍ ബത്തേരി നഗരസഭ പ്രമേയം പാസാക്കി. സിപിഎം നേതൃത്വത്തിലുള്ള ഭരണസമിതിയാണ് പ്രമേയം പാസാക്കിയത്. നേരിട്ട് വിവരശേഖരണം നടത്തണമെന്നാണ് ആവശ്യം. സുല്‍ത്താന്‍ ബത്തേരി നഗരമാകെ ബഫര്‍സോണ്‍ പരിധിയിലാണ് വരുന്നത്.
ബഫര്‍ സോണ്‍ വിഷയത്തില്‍ ശാശ്വത പരിഹാരത്തിന് സര്‍ക്കാര്‍ ഉടന്‍ ഇടപെടണമെന്ന് കെസിബിസി. സംസ്ഥാന സര്‍ക്കാര്‍ കൃത്യമായ ഡാറ്റയോടെ സമീപിച്ചാല്‍ ബഫര്‍ സോണ്‍ സംബന്ധിച്ച് ആവശ്യമായ ഭേദഗതിക്ക് സന്നദ്ധമാണെന്ന് സുപ്രീംകോടതി വ്യക്തമാക്കിയിട്ടുണ്ട്.
വന്യജീവി സങ്കേതം ജനവാസ കേന്ദ്രവുമായി അതിര്‍ത്തി പങ്കിടുന്നയിടങ്ങളില്‍ സംരക്ഷിത വനത്തിന്റെ ഒരു കിലോമീറ്റര്‍ എങ്കിലും ഉള്ളിലേക്ക് മാറ്റി വന്യജീവി സങ്കേതങ്ങളുടെ അതിര്‍ത്തി പുനര്‍നിര്‍ണയിക്കണം. ഇത് കേന്ദ്ര വൈല്‍ഡ് ലൈഫ് ബോര്‍ഡിനെ ബോധ്യപ്പെടുത്തി സുപ്രീം കോടതി വഴി പ്രശ്നപരിഹാരം തേടണമെന്നും കെസിബിസി പ്രസിഡന്റ് കര്‍ദിനാള്‍ ബസേലിയോസ് ക്ലീമിസ് കാതോലിക്കാബാവ പറഞ്ഞു.
