സിബിഐ അസൗകര്യം അറിയിച്ചതിനെ തുടര്‍ന്ന് 35ാം തവണയും ലാവ്ലിന് കേസ് സുപ്രീംകോടതി മാറ്റിവച്ചു. ആറ് വര്‍ഷത്തിനിടെ നാല് ബെഞ്ചുകളിലായി 35ാം തവണയാണ് കേസ് മാറ്റിവയ്ക്കുന്നത്. സിബിഐയ്ക്ക് വേണ്ടി ഹാജരാകുന്ന അഭിഭാഷകന് എസ്‌വി രാജു മറ്റൊരു കേസിന്റെ തിരക്കിലായതിനാല്‍ ലാവ്ലിന് കേസില്‍ ഹാജരാകാന്‍ കഴിയില്ലെന്ന് സുപ്രീം കോടതിയെ അറിയിക്കുകയായിരുന്നു.
കേസ് മാറ്റിവയ്ക്കണോ എന്ന് ജസ്റ്റിസ് സൂര്യകാന്ത് അദ്ധ്യക്ഷനായ ബെഞ്ച് ചോദിക്കുകയുണ്ടായി. എസ്‌വി രാജു മറ്റൊരു കോടതിയിലാണെന്നും ഇന്ന് ഹാജരാകാന്‍ സാധിക്കില്ലെന്നും സിബിഐ അറിയിച്ചതോടെയാണ് 35ാം തവണയും ലാവ്ലിന് കേസ് മാറ്റി വയ്ക്കുന്നത്. മുഖ്യമന്ത്രി പിണറായി വിജയന് ഉള്‍പ്പെടെ മൂന്ന് പേരെ കുറ്റവിമുക്തരാക്കിയ ഹൈക്കോടതി വിധിക്കെതിരെയുള്ള സിബിഐയുടെ ഹര്‍ജിയാണ് സുപ്രീംകോടതിയുടെ പരിഗണനയിലുള്ളത്.
ജസ്റ്റിസ് ദീപാങ്കര്‍ ദത്ത, ജസ്റ്റിസ് സൂര്യകാന്ത് എന്നിവരടങ്ങിയ ബെഞ്ചാണ് ലാവ്ലിന് കേസ് മാറ്റിവച്ചത്. ജൂലൈയില്‍ കേസ് പരിഗണിച്ചപ്പോഴും സിബിഐയാണ് കേസ് മാറ്റിവയ്ക്കണമെന്ന് ആവശ്യപ്പെട്ടിരുന്നത്. മുതിര്‍ന്ന അഭിഭാഷകനായ ഹരീഷ് സാല്‍വേയാണ് പിണറായി വിജയന് വേണ്ടി കോടതിയില്‍ ഹാജരാകുന്നത്.
വൈദ്യുതി ബോര്‍ഡിന്റെ മുന്‍ സാമ്പത്തിക ഉപദേഷ്ടാവ് കെജി രാജശേഖരന്‍ നായര്‍, ബോര്‍ഡിന്റെ മുന്‍ ചെയര്‍മാന്‍ ആര്‍ ശിവദാസന്‍, മുന്‍ ചീഫ് എന്‍ജിനീയര്‍ കസ്തൂരിരംഗ അയ്യര്‍ എന്നിവരുടെ ഹര്‍ജിയും ഇതോടൊപ്പം പരിഗണിക്കുന്നുണ്ട്. പന്നിയാര്‍, ചെങ്കുളം, പള്ളിവാസല്‍ ജല വൈദ്യുത പദ്ധതികളുടെ നവീകരണത്തിന് കാനഡയിലെ എസ്എന്‍സി ലാവ്ലിന് കമ്പനിയുമായി കരാറുണ്ടാക്കിയതില്‍ ക്രമക്കേട് ഉണ്ടായെന്നും ഇതുവഴി 86.25 കോടിയുടെ നഷ്ടം സംഭവിച്ചുവെന്നുമാണ് കേസ്.