സംസ്ഥാനത്ത് നടന്ന ഏറ്റവും വലിയ ഓണ്‍ലൈന്‍ തട്ടിപ്പിലെ പ്രതികളെ കസ്റ്റഡിയിലെടുത്ത് പൊലീസ്. ആലപ്പുഴയിലെ ഡോക്ടര്‍ ദമ്പതിമാരില്‍നിന്ന് ഓണ്‍ലൈനിലൂടെ ഏഴരക്കോടി തട്ടിയെടുത്ത ചൈനീസ് പൗരന്മാരാണ് അറസ്റ്റിലായിട്ടുള്ളത്. തായ്‌വാന്‍ സ്വദേശികളായ വെയ് ചുങ് വാന്‍, ഷെന്‍ ഹോ എന്നിവരാണ് പിടിയിലായത്.
20 തവണയായി പ്രതികള്‍ ഡോക്ടര്‍മാരില്‍ നിന്ന് ഏഴരക്കോടി തട്ടിയെടുക്കുകയായിരുന്നു. ദമ്പതിമാര്‍ ചേര്‍ത്തല പൊലീസില്‍ നല്‍കിയ പരാതിയില്‍ കേസ് രജിസ്റ്റര്‍ ചെയ്തു. എന്നാല്‍ ആദ്യഘട്ടത്തില്‍ പ്രതികളെ കുറിച്ച് വിവരം ഒന്നും ലഭിച്ചിരുന്നില്ല. കഴിഞ്ഞ ജൂണിലാണ് തട്ടിപ്പ് നടന്നത്. ഓഹരി വിപണിയില്‍ അമിതലാഭം വാഗ്ദാനം ചെയ്ത്തായിരുന്നു തട്ടിപ്പ്.
ചേര്‍ത്തല പൊലീസ് നടത്തിയ അന്വേഷണത്തില്‍ കോഴിക്കോട് സ്വദേശികളായ അനസ്, പ്രവീഷ്, അബ്ദുദുള്‍ സമദ് എന്നിവരെ കസ്റ്റഡിയിലെടുത്തു. തുടര്‍ന്ന് ഇതര സംസ്ഥാനക്കാരായ ഭഗവല്‍ റാം, നിര്‍മല്‍ ജയ്ന്‍ എന്നിവരെയും പിടികൂടി. ഇവരില്‍ നിന്നാണ് ചൈന കേന്ദ്രീകരിച്ച് പ്രവര്‍ത്തിക്കുന്ന വലിയൊരു റാക്കറ്റാണ് തട്ടിപ്പിന് പിന്നിലെന്ന് കണ്ടെത്തിയത്.
എന്നാല്‍ പ്രതികളിലേക്കെത്താന്‍ പൊലീസിന് സാധിച്ചില്ല. ഇതേസമയം അഹമ്മദാബാദ് പൊലീസ് രണ്ട് ചൈനീസ് പൗരന്മാരെ അറസ്റ്റ് ചെയ്ത വിവരം കേരള പൊലീസിന് ലഭിച്ചു. തുടര്‍ന്ന് പ്രത്യേക സംഘത്തെ അഹമ്മദാബാദിലേക്ക് അയയ്ക്കുകയും കോടതിവഴി കസ്റ്റഡിയില്‍ വാങ്ങുകയുമായിരുന്നു.