ചെറുതോണി പാലവും അരികൊമ്പന്‍ ഫേമസ് ആക്കിയ മൂന്നാര്‍ ബോഡിമെട്ട് റോഡും ജനങ്ങള്‍ക്കായി ഒക്ടോബര്‍ 12ന് തുറന്ന് കൊടുക്കും. പദ്ധതിയുടെ ഉദ്ഘാടനത്തിനായി കേന്ദ്ര ഉപരിതല ഗതാഗത വകുപ്പ് മന്ത്രി നിധിന്‍ ഗഡ്ഗരി മൂന്നാറിലെത്തും.
12ന് ഉച്ചകഴിഞ്ഞ് രണ്ടിന് മൂന്നാര്‍ ഹൈ ആള്‍ട്ടിറ്റിയൂഡ് സ്‌പോട്‌സ് സെന്റര്‍ ഗ്രൗണ്ടിലാണ് ചടങ്ങ് നടക്കുക. നിധിന്‍ ഗഡ്ഗരി കാസര്‍ഗോഡില്‍ നിന്നും പത്യേക ഹെലികോപ്റ്ററില്‍ മൂന്നാറിലെത്തിച്ചേരും
കൊച്ചി-ധനുഷ്‌കോടി ദേശീയപാതയുടെ ഭാഗമായ റോഡിന്റെ നവീകരണം ആറ് വര്‍ഷം കൊണ്ടാണ് പൂര്‍ത്തീകരിച്ചത്. 381.76 കോടി ചിലവഴിച്ചാണ് 42 കിലോമീറ്റര്‍ റോഡിന്റെ നവീകരണ പ്രവര്‍ത്തനങ്ങള്‍ പൂര്‍ത്തിയാക്കിയത്. 2017 ല്‍ നിര്‍മാണ ജോലികള്‍ തുടങ്ങി. നാല് മീറ്റര്‍ റോഡിന്റെ വീതി പതിനഞ്ച് മീറ്ററായി കൂട്ടി. റോഡ് കടന്ന് പോകുന്ന മൂന്നര കിലോമീറ്റര്‍ വനഭൂമിയാണ്. ദേവികുളം ഗ്യാപ്പ് റോഡില്‍ തുടര്‍ച്ചയായി മണ്ണിടിഞ്ഞതും വനം വകുപ്പുന്നയിച്ച നിയമപ്രശ്‌നങ്ങളുമെല്ലാം അതിജീവിച്ചായിരുന്നു നിര്‍മാണം.
കരാറുകാരെ പ്രതിക്കൂട്ടിലാക്കിയുള്ള അഴിമതിയാരോപണങ്ങളും ഉയര്‍ന്നു. ദേശീയപാതയുടെ ഉദ്ഘാടനം കഴിയുന്നതോടെ ജില്ലയിലെ ആദ്യ ടോള്‍പ്ലാസയും നിലവില്‍ വരും. ദേവികുളം ലാക്കാട് ഭാഗത്താണ് ടോള്‍ പ്ലാസ നിര്‍മിച്ചിട്ടുള്ളത്. മുഖം മിനുക്കിയ പാത മൂന്നാറിന്റെ വിനോദ സഞ്ചാരമേഖലക്കും മുതല്‍ക്കൂട്ടാകും.
തേയിലത്തോട്ടങ്ങള്‍ക്കിടയിലൂടെ ഉന്നത നിലവാരത്തിലുള്ള റോഡിലൂടെയുള്ള യാത്ര മനോഹരമായിരിക്കും. ആനയിറങ്കല്‍ അണക്കെട്ട്, പെരിയകനാല്‍ വെള്ളച്ചാട്ടം, ഗ്യാപ് റോഡ്ലാക്കാട് വ്യൂ പോയിന്റ് തുടങ്ങിയ കാഴ്ചകള്‍ കണ്ടുകൊണ്ട് സുഖകരമായി യാത്രചെയ്യാം. ചിന്നക്കനാലിനെ വിറപ്പിച്ച അരികൊമ്പനെ വനംവകുപ്പ് പിടികൂടി കൊണ്ടു പോയത് ഈ പാതയിലൂടെയായിരുന്നു. അന്ന് ഈ പാതയെചൊല്ലി അവകാശ വാദങ്ങള്‍ ഉയര്‍ന്നിരുന്നു.