മുഖ്യമന്ത്രി പിണറായി വിജയന്റെ എസ്‌കോര്‍ട്ട് വാഹനങ്ങള്‍ കൂട്ടിയിടിച്ച് അപകടം. തിങ്കളാഴ്ച വൈകുന്നേരം തിരുവനന്തപുരം വാമനപുരം പാര്‍ക്ക് ജംഗ്ഷനിലാണ് അപകടം നടന്നത്. പിണറായി വിജയന്റെ എസ്‌കോര്‍ട്ട് വാഹനങ്ങളില്‍ അഞ്ചെണ്ണം കൂട്ടിയിടിച്ചാണ് അപകടമുണ്ടായത്. സ്‌കൂട്ടര്‍ യാത്രക്കാരിയെ രക്ഷിക്കാന്‍ ശ്രമിക്കുമ്പോഴായിരുന്നു അപകടം.
മുഖ്യമന്ത്രി കോട്ടയത്ത് നിന്നും തിരുവനന്തപുരത്തേക്ക് വരികയായിരുന്നു. വാമനപുരം പാര്‍ക്ക് ജംഗ്ഷനില്‍ വച്ച് വലത്തേക്ക് തിരിഞ്ഞ സ്‌കൂട്ടര്‍ യാത്രക്കാരിയെ രക്ഷിക്കാനായി മുന്‍പേ പോയ വാഹനം അപ്രതീക്ഷിതമായി ബ്രേക്ക് ചെയ്തതാണ് അപകടത്തിന് കാരണമായത്. മറ്റ് അപകടങ്ങള്‍ ഇല്ലാത്തതിനാല്‍ മുഖ്യമന്ത്രിയുടെ വാഹനം ഉടന്‍ തന്നെ പുറപ്പെട്ടു.
കൂട്ടിയിടിച്ച വാഹനങ്ങള്‍ വാമനപുരം ജംഗ്ഷനില്‍ നിര്‍ത്തിയിട്ടു. സ്‌കൂട്ടര്‍ യാത്രക്കാരി എംസി റോഡില്‍ നിന്ന് ആറ്റിങ്ങല്‍ ഭാഗത്തേക്ക് പോകാനായി തിരിയുമ്പോഴാണ് മുന്‍പേ പോയ എസ്‌കോര്‍ട്ട് വാഹനം അപ്രതീക്ഷിമായി ബ്രേക്ക് ചെയ്തത്.