ഇടുക്കി പൊന്മുടിയില്‍ കെ.എസ്.ഇ.ബി ഭൂമി പാട്ടത്തിന് നല്‍കിയ സംഭവത്തില്‍ സി.പി.എമ്മിനെതിരെ വിമര്‍ശനവുമായി സി.പി.ഐ. ഭൂമി കൈമാറ്റത്തില്‍ വീഴ്ച സംഭവിച്ചതായി സി.പി.ഐ ഇടുക്കി ജില്ല സെക്രട്ടറി കെ.കെ.ശിവരാമന്‍ പറഞ്ഞു. പൊന്മുടിയില്‍ ഹൈഡല്‍ ടൂറിസവുമായി ബന്ധപ്പെട്ട് ഭൂമി നല്‍കുന്നതിന് മുമ്പ് ആവശ്യമായ ചര്‍ച്ചയും പഠനവും നടത്തേണ്ടതായിരുന്നു. വിഷയം ഗൗരവമുള്ളതാണെന്ന് ശിവരാമന്‍ പറഞ്ഞു.
വൈദ്യുതി വകുപ്പിന് കൈമാറിയ സര്‍ക്കാര്‍ ഭൂമി ആവശ്യത്തിന് ശേഷം മിച്ചമുള്ളത്് റവന്യൂ വകുപ്പിന് നല്‍കേണ്ടതാണ്. അത്തരം കാര്യങ്ങള്‍ പരിശോധിക്കേണ്ടത് സര്‍ക്കാര്‍ ആണെന്നും ശിവരാമന്‍ ചൂണ്ടിക്കാട്ടി.
ഡാമിനടുത്തുള്ള 21 ഏക്കര്‍ ഭൂമിയാണ് രാജക്കാട് സര്‍വീസ് സഹകരണ ബാങ്കിന് കെ.എസ്.ഇ.ബി ഹൈഡല്‍ ടൂറിസത്തിനായി പാട്ടത്തിന് നല്‍കിയത്. രണ്ടുസര്‍വേ നമ്പരുകളിലായി കെഎസ്ഇബിയുടെ കൈവശമുള്ള ഈ ഭൂമി റവന്യൂ പുറമ്പോക്കാണെന്ന് ഉടുമ്പന്‍ചോല തഹസില്‍ദാര്‍ കളക്ടര്‍ക്ക് റിപ്പോര്‍ട്ട് സമര്‍പ്പിച്ചിരുന്നു. ഇതിന്റെ അടിസ്ഥാനത്തില്‍ കഴിഞ്ഞ ദിവസം സര്‍വേക്കെത്തിയ ഉദ്യോഗസ്ഥരെ രാജാക്കാട് സഹകരണ ബാങ്ക് പ്രസിഡന്റ് വി.എം കുഞ്ഞുമോന്റെ നേതൃത്വത്തില്‍ തടഞ്ഞിരുന്നു.
കെ.എസ്.ഇ.ബി ഉദ്യോഗസ്ഥരുടെ സാന്നിധ്യമില്ലാതെ പരിശോധന നടത്താന്‍ അനുവദിക്കില്ലെന്നാണ് രാജാക്കാട് ബാങ്ക് പ്രസിഡന്റ് റവന്യൂ ഉദ്യോഗസ്ഥരെ അറിയിച്ചത്.ഇതോടെ സര്‍വേ നടപടികള്‍ പൂര്‍ത്തിയാകാതെ ഉദ്യോഗസ്ഥര്‍ മടങ്ങി. എന്നാല്‍ ഇവിടെ സര്‍വേക്ക് ബാങ്കിന്റെ അനുമതി തേടേണ്ടതിന്റെ ആവശ്യമില്ലെന്ന് തഹസില്‍ദാര്‍ വ്യക്തമാക്കിയിരുന്നു.
Read more
സംഭവം വിവാദമായതോടെ ചൊവ്വാഴ്ചയോടെ കെ.എസ്.ഇ.ബിക്ക് നോട്ടിസ് നല്‍കി സര്‍വേ നടപടികളുമായി മുന്നോട്ട് പോകാനാണ് റവന്യൂ സംഘത്തിന്റെ നീക്കം
