സി വി ശ്രീരാമന്‍ ട്രസ്റ്റ് ഏര്‍പ്പെടുത്തിയിട്ടുള്ള ശ്രീരാമന്‍ സ്മൃതി പുരസ്‌കാരം സലീം ഷെരീഫിന്. സലീം ഷെരീഫിന്റെ പൂക്കാരന്‍ എന്ന കഥാസമാഹാരമാണ് പുരസ്‌കാരത്തിന് അര്‍ഹമായത്.സലീം ഷെരീഫിന്റെ പൂക്കാരന്‍ ശ്രീരാമന്‍ സ്മൃതി പുരസ്‌കാരത്തിനായി തിരഞ്ഞെടുത്തതായി ട്രസ്റ്റ് ചെയര്‍മാന്‍ വി കെ ശ്രീരാമന്‍ , ടി കെ വാസു എന്നിവരാണ് അറിയിച്ചത്.
40 വയസ്സില്‍ താഴെയുള്ള യുവ കഥാകൃത്തുക്കള്‍ക്ക് നല്‍കുന്നതാണ് ശ്രീരാമന്‍ സ്മൃതി പുരസ്‌കാരം. 28000 രൂപയും പ്രശസ്തി പത്രവും ശില്‍പ്പവും അടങ്ങുന്നതാണ് പുരസ്‌ക്കാരം. തമിഴ്നാട്ടില്‍ നീലഗിരി ജില്ലയിലെ എരുമാട് സ്വദേശിയാണ് പുരസ്‌കാര നേട്ടത്തിന് അര്‍ഹനായ കഥാകൃത്ത് സലീം ഷെരീഫ്. കെ എം. മോഹന്‍ദാസ്, കെ വി സുബ്രഹ്‌മണ്യന്‍, പ്രശസ്ത നോവലിസ്റ്റ് മനോഹരന്‍ വി പേരകം എന്നിവരടങ്ങുന്ന ജൂറിയാണ് പുരസ്‌കാരകൃതി തിരഞ്ഞെടുത്തത്.
ഒക്ടോബര്‍ 26ന് വൈകിട്ട് അഞ്ചിന് കുന്നംകുളം നഗരസഭ ലൈബ്രറി അങ്കണത്തില്‍ വച്ച് നടക്കുന്ന സി വി ശ്രീരാമന്‍ അനുസ്മരണ സമ്മേളനത്തില്‍ ട്രസ്റ്റ് ചെയര്‍മാന്‍ വി കെ ശ്രീരാമന്‍ അവാര്‍ഡ് സമര്‍പ്പണം നടത്തും. എ സി മൊയ്തീന്‍ എം എല്‍എ അധ്യക്ഷനാകുന്ന ചടങ്ങ് നോവലിസ്റ്റ് എസ് ഹരീഷ് ഉദ്ഘാടനം ചെയ്യും. നിരൂപക ഡോ. ജി ഉഷാകുമാരി സി വി ശ്രീരാമന്‍ സ്മാരക പ്രഭാഷണം നിര്‍വ്വഹിക്കും.