പത്തനംതിട്ട തിരുവല്ലയില്‍ കര്‍ഷകന്‍ തൂങ്ങി മരിച്ചനിലയില്‍. നിരണം സ്വദേശി രാജീവാണ് മരിച്ചത്. കടബാദ്ധ്യതയെ തുടര്‍ന്നാണ് ആത്മഹത്യയെന്നാണ് നിഗമനം.
ഞായറാഴ്ച വൈകുന്നേരമാണ് രാജീവിനെ പാടവരമ്പത്ത് തൂങ്ങി മരിച്ച നിലയില്‍ കണ്ടെത്തിയത്. ഭൂമി പാട്ടത്തിനെടുത്താണ് ഇയാള്‍ കൃഷി ചെയ്തിരുന്നത്. വേനല്‍മഴയെ തുടര്‍ന്ന് ഏട്ടേക്കറോളം കൃഷി നശിച്ചിരുന്നു.
രണ്ട് സാമ്പത്തിക സ്ഥാപനങ്ങളില്‍ നിന്നായി രാജീവ് കാര്‍ഷിക വായ്പയെടുത്തിരുന്നു. കൃഷി നഷ്ടമായതിനെ തുടര്‍ന്ന് കട ബാദ്ധ്യത ഉണ്ടായിരുന്നുവെന്നാണ് ബന്ധുക്കള്‍ പറയുന്നത്. കഴിഞ്ഞ വര്‍ഷം കൃഷി നശിച്ചപ്പോള്‍ തുച്ഛമായ നഷ്ട പരിഹാരമാണ് ലഭിച്ചത്. ഇക്കാര്യത്തില്‍ നിയമ നടപടികള്‍ പുരോഗമിക്കുകയായിരുന്നു.
പൊലിസ് സ്ഥലത്തെത്തി മൃതദേഹം താലൂക്ക് ആശുപത്രിയിലേക്ക് മാറ്റി. അസ്വാഭാവിക മരണത്തിനും കേസെടുത്തിട്ടുണ്ട്.