ജവാന്റെ റമ്മിന്റെ പേര് മാറ്റണമെന്ന് നിവേദനം. തിരുവല്ലയിലെ ട്രാവന്കൂര് ഷുഗേഴ്സ് ആന്ഡ് കെമിക്കല് ലിമിറ്റഡ് ഉത്പ്പാദിപ്പിക്കുന്ന ഏറ്റവും ജനപ്രിയ ബ്രാന്ഡുകളിലൊന്നായ ജവാന് റമ്മിന്റെ പേര് മാറ്റണമെന്ന് ഒരു സ്വകാര്യ വ്യക്തിയാണ് നികുതി വകുപ്പിനു നല്കിയ നിവേദനത്തില് ആവശ്യപ്പെട്ടത്. നിവേദനം എക്സൈസ് കമ്മിഷണര്ക്കു കൈമാറി.
‘ജവാന്’ എന്ന പേര് മദ്യത്തിന് ഉപയോഗിക്കുന്നത് സൈനികര്ക്കു നാണക്കേടാണെന്ന് പരാതിയില് പറയുന്നു. മദ്യത്തിന്റെ ഉത്പാദകര് സര്ക്കാര് സ്ഥാപനമായതിനാല് പേര് മാറ്റാന് നടപടിയുണ്ടാകണമെന്നും പരാതിയില് ആവശ്യപ്പെട്ടിട്ടുണ്ട്. പരാതിയില് കഴമ്പുണ്ടെങ്കില് തുടര്നടപടികളിലേക്കു സര്ക്കാര് കടക്കും. എന്നാല് സര്ക്കാര് ഉല്പാദിപ്പിക്കുന്ന പ്രമുഖ മദ്യ ബ്രാന്ഡായതിനാല് പരാതി തള്ളാനാണ് ഏറെയും സാധ്യത.
Read more
നിലവില് നാല് ലൈനുകളിലായി 7,500 കെയ്സ് മദ്യമാണ് ഒരു ദിവസം ഉല്പ്പാദിപ്പിക്കുന്നത്. 1.50 ലക്ഷം കെയ്സ് മദ്യമാണ് ഒരു മാസം വില്ക്കുന്നത്. സംസ്ഥാനത്തെ 23 വെയര്ഹൗസുകളിലൂടെയാണ് വിതരണം നടക്കുന്നത്. ആറ് ഉല്പാദന ലൈനുകള് കൂടി അനുവദിക്കണമെന്ന സ്ഥാപനത്തിന്റെ ആവശ്യം പരിഗണനയിലാണ്. ഇത് നടപ്പിലായാല് 10,000 കെയ്സ് അധികം ഉല്പാദിപ്പിക്കാന് കഴിയും. ഒരു ലൈന് സ്ഥാപിക്കാന് 30 ലക്ഷം രൂപ ചെലവാകുമെന്നാണ് കമ്പനിയുടെ കണക്ക്.