വിവാദങ്ങള്‍ക്ക് പിന്നാലെ ആര്‍എല്‍വി രാമകൃഷ്ണന് വേദി നല്‍കുമെന്ന് പ്രഖ്യാപിച്ച് സുരേഷ്‌ഗോപി. കുടുംബ ക്ഷേത്രത്തിലെ ചിറപ്പ് മഹോത്സവത്തിന് രാമകൃഷ്ണനെ ക്ഷണിക്കുമെന്ന് സുരേഷ്‌ഗോപി പറഞ്ഞു. പ്രതിഫലം നല്‍കിയാകും ആര്‍എല്‍വി രാമകൃഷ്ണനെ ക്ഷണിക്കുന്നതെന്നും സുരേഷ്‌ഗോപി കൂട്ടിച്ചേര്‍ത്തു.
സത്യഭാമയുടെ വിവാദ പരാമര്‍ശത്തിലും സുരേഷ്‌ഗോപി പ്രതികരിച്ചു. വിവാദങ്ങളില്‍ കക്ഷി ചേരാനില്ലെന്നായിരുന്നു പ്രതികരണം. സുരേഷ്‌ഗോപി വേദി നല്‍കുമെന്ന് അറിയിച്ചതില്‍ സന്തോഷമുണ്ടെന്ന് രാമകൃഷ്ണന് പ്രതികരിച്ചു. സത്യഭാമയ്‌ക്കെതിരെ പരാതി നല്‍കുമെന്നും രാമകൃഷ്ണന് പറഞ്ഞു. പൊലീസിനും സാംസ്‌കാരിക വകുപ്പിനും മുഖ്യമന്ത്രിക്കുമാണ് പരാതി നല്‍കുക.
അതേസമയം പത്മശ്രീ അവാര്‍ഡ് ലഭിക്കാന്‍ സഹായം അഭ്യര്‍ത്ഥിച്ച് കലാമണ്ഡലം ഗോപി തന്നെ സമീപിച്ചിരുന്നതായും സുരേഷ്‌ഗോപി പറഞ്ഞു. കലാമണ്ഡലം ഗോപിയെയും കുടുംബത്തെയും മാനിച്ചാണ് താന്‍ ഒന്നും പറയാതിരുന്നത്. കലാമണ്ഡലം ഗോപിയെ വീട്ടില്‍ പോയി കാണില്ലെന്നും സുരേഷ്‌ഗോപി പറഞ്ഞു.