ഗവര്‍ണര്‍ ആരിഫ് മുഹമ്മദ് ഖാനെതിരെ വീണ്ടും എസ്എഫ്‌ഐ പ്രതിഷേധം. ഇരിങ്ങാലക്കുടയിലാണ് എസ്എഫ്‌ഐ പ്രവര്‍ത്തകര്‍ ഗവര്‍ണറെ തടഞ്ഞ് കരിങ്കൊടി പ്രതിഷേധം നടത്തിയത്. ഗവര്‍ണര്‍ ഗാന്ധി സ്മൃതി പരിപാടിയില്‍ പങ്കെടുക്കാനെത്തിയതായിരുന്നു. ഇതിനിടെയാണ് എസ്എഫ്‌ഐ പ്രവര്‍ത്തകര്‍ പൊലീസിന്റെ കണ്ണുവെട്ടിച്ച് പ്രതിഷേധവുമായെത്തിയത്.
അഞ്ച് സ്ഥലങ്ങളില്‍ എസ്എഫ്‌ഐ പ്രവര്‍ത്തകര്‍ ഗവര്‍ണര്‍ക്കെതിരെ പ്രതിഷേധിച്ചു. ടൗണ്‍ ഹാള്‍ പരിസരത്തും എസ്എഫ്‌ഐ പ്രവര്‍ത്തകര്‍ പൊലീസിനെ വെട്ടിച്ച് പ്രതിഷേധവുമായി രംഗത്തെത്തിയിരുന്നു. ഗവര്‍ണര്‍ക്കെതിരെയുള്ള മുദ്രാവാക്യങ്ങളും കരിങ്കൊടിയുമായാണ് പ്രവര്‍ത്തകര്‍ പ്രതിഷേധിച്ചത്.
അതേസമയം എസ്എഫ്‌ഐയും സര്‍ക്കാരും ഒത്തുകളിക്കുകയാണെന്ന് ഗവര്‍ണര്‍ ആരോപിച്ചു. തനിക്കെതിരെ കരിങ്കൊടി കാണിക്കണ്ട ആക്രമിക്കാനാണെങ്കില്‍ താന്‍ കാറിന് പുറത്തേക്ക് വരാമെന്നും ഗവര്‍ണര്‍ പ്രതിഷേധക്കാരോട് പറഞ്ഞു. സര്‍ക്കാരും വിദ്യാര്‍ത്ഥികളും ചേര്‍ന്ന് നടത്തുന്ന നാടകമാണ് പ്രതിഷേധമെന്നും ഗവര്‍ണര്‍ ആരോപിച്ചു.