തിരുവനന്തപുരം നഗരത്തില്‍ കുടിവെള്ള പ്രശ്‌നം രൂക്ഷമായി തുടരുന്ന സാഹചര്യത്തില്‍ കോര്‍പ്പറേഷന്‍ പരിധിയിലെ സ്‌കൂളുകള്‍ക്ക് നാളെ അവധി. കുടിവെള്ള പ്രശ്‌നത്തിന് പരിഹാരമുണ്ടാകാത്തതിനാലാണ് സ്‌കൂളുകള്‍ക്ക് അവധി പ്രഖ്യാപിച്ചിരിക്കുന്നത്. വിഷയത്തെ തുടര്‍ന്ന് കോര്‍പറേഷന്‍ പരിധിയിലെ സ്‌കൂളുകളുടെ കാര്യത്തില്‍ തീരുമാനമെടുക്കാന്‍ മന്ത്രി വി ശിവന്‍കുട്ടി കളക്ടര്‍ക്ക് നിര്‍ദ്ദേശം നല്‍കിയിരുന്നു.
തിരുവനന്തപുരം-കന്യാകുമാരി റെയില്‍വേ ലൈന്‍ ഇരട്ടിപ്പിക്കുന്നതിനോട് അനുബന്ധിച്ച് നടത്തുന്ന അറ്റകുറ്റപ്പണികളാണ് തലസ്ഥാനത്ത് കുടിവെള്ള പ്രശ്‌നം സൃഷ്ടിച്ചത്. രണ്ട് ദിവസം കൊണ്ട് പൂര്‍ത്തിയാക്കേണ്ട അറ്റകുറ്റപ്പണികളാണ് നാല് ദിവസം കഴിഞ്ഞിട്ടും അനശ്ചിതത്വത്തില്‍ തുടരുന്നത്. നഗരത്തിലെ 44 വാര്‍ഡുകളില്‍ കുടിവെള്ള ക്ഷാമം തുടരുകയാണ്.
Read more
അറ്റകുറ്റപ്പണികളുടെ ഭാഗമായുള്ള പൈപ്പ് മാറ്റിയിടല്‍ അവസാന ഘട്ടത്തിലേക്ക് അടുത്തുകൊണ്ടിരിക്കുകയാണ്. സ്‌കൂളുകളില്‍ ഓണപ്പരീക്ഷ അടുത്തുകൊണ്ടിരിക്കുന്നതും ജനങ്ങളില്‍ ആശങ്കയ്ക്കിടയാക്കുന്നുണ്ട്. കുടിവെള്ള ക്ഷാമത്തെ തുടര്‍ന്ന് നഗരത്തിന്റെ വിവിധ ഭാഗങ്ങളില്‍ നിന്ന് കനത്ത പ്രതിഷേധം ഉടലെടുത്തിരുന്നു. ഇതിന് പിന്നാലെ രാവിലെ തുടങ്ങിയ പരീക്ഷണ പമ്പിംഗ് വാല്‍വിലെ ചോര്‍ച്ചയെ തുടര്‍ന്ന് നിര്‍ത്തിവയ്ക്കുകയായിരുന്നു.
