ഭാരത് ജോഡോ യാത്ര കടന്നുപോകുന്ന വഴിയില്‍ പരിഹാസം നിറഞ്ഞ കുറിപ്പുള്ള ബോര്‍ഡുകള്‍ സ്ഥാപിച്ച് ഡിവൈഎഫ്‌ഐ. പോരാട്ടമാണ് ബദല്‍, പൊറോട്ടയല്ല എന്ന് എഴുതിയ ബാനറുകളാണ് വഴിയരികില്‍ സ്ഥാപിച്ചത്. ഇത് ശ്രദ്ധയില്‍പ്പെട്ട് കോണ്‍ഗ്രസ് പ്രവര്‍ത്തകര്‍ ബാനറുകള്‍ കൈയോടെ നശിപ്പിച്ചു.
പുതുക്കാട്, വടക്കാഞ്ചേരി എന്നിവടങ്ങളില്‍ ആയിരുന്നു ബോര്‍ഡുകള്‍. യാത്രയ്ക്കിടെ രാഹുല്‍ഗാന്ധി ഹോട്ടലുകളില്‍ കയറുന്നത് പരിഹസിച്ചായിരുന്നു ബോര്‍ഡുകള്‍ സ്ഥാപിച്ചിരുന്നത്. പ്രചരണ ബോര്‍ഡുകള്‍ നശിപ്പിക്കുന്ന ദൃശ്യങ്ങളും ഡിവൈഎഫ്‌ഐ പ്രവര്‍ത്തകര്‍ പ്രചരിപ്പിക്കുന്നുണ്ട്.
ഹുല്‍ ഗാന്ധി നയിക്കുന്ന ഭാരത് ജോഡോ യാത്ര പാലക്കാട് ജില്ലയില്‍ പര്യടനം ആരംഭിച്ചു. ഷൊര്‍ണൂര്‍ എസ്.എം.പി ജങ്ഷനില്‍ നിന്ന് രാവിലെ 6.30നാണ് ഇന്നത്തെ പര്യടനം തുടങ്ങിയത്. 10.25ന് മഹാത്മഗാന്ധി പ്രതിമയില്‍ രാഹുല്‍ ഹാരമണിയിച്ചു. 10.30ന് പട്ടാമ്പിയില്‍ രാവിലത്തെ പര്യടനം പൂര്‍ത്തിയാക്കി.
വി.കെ. ശ്രീകണ്ഠന്‍ എം.പി, കോണ്‍ഗ്രസ് നേതാവ് വി.ടി. ബല്‍റാം എന്നിവര്‍ പദയാത്രയുടെ ഭാഗമായി. വൈകീട്ട് അഞ്ച് മണിക്കാണ് പദയാത്ര വീണ്ടും ആരംഭിക്കുക. ഏഴ് മണിക്ക് കൊപ്പത്ത് ഇന്നത്തെ യാത്ര സമാപിക്കും.
