കോട്ടയം ഈരാറ്റുപേട്ടയില്‍ വീടിന്റെ ഗേറ്റ് ദേഹത്ത് വീണ് നാല് വയസുകാരന് ദാരുണാന്ത്യം. ഈരാറ്റുപേട്ട പുത്തന്‍ പള്ളി കോമക്കാടത്ത് വീട്ടില്‍ ജവാദ്, ശബാസ് ദമ്പതികളുടെ മകന്‍ അഹ്‌സന്‍ അലിയാണ് മരിച്ചത്.
ഇന്ന് രാവിലെ 10 മണിയോടെയായിരുന്നു അപകടം നടന്നത്. ഗേറ്റില്‍ നിന്ന് കളിക്കുന്നതിനിടെ ഗേറ്റ് ഇളകി ദേഹത്തേക്ക് വീഴുകയായിരുന്നു. തലയ്ക്കാണ് കുട്ടിക്ക് പരിക്കേറ്റത്. ഉടനെ അടുത്തുള്ള സ്വകാര്യ ആശുപത്രിയില്‍ എത്തിച്ചെങ്കിലും മരിക്കുകയായിരുന്നു.
മൃതദേഹം പോസ്റ്റുമോര്‍ട്ടത്തിനായി കോട്ടയം മെഡിക്കല്‍ കോളജിലേക്ക് കൊണ്ടുപോയി. ഖബറടക്കം ഇന്ന് വൈകിട്ട് 5.30ന് ഈരാറ്റുപേട്ട പുത്തന്‍പള്ളി ഖബര്‍സ്ഥാനില്‍ നടക്കും.
പുത്തന്‍പള്ളി ചീഫ് ഇമാം നദീര്‍ മൗലവിയുടെ ചെറുമകനാണ് അഹ്‌സല്‍.