ഇടുക്കിയില്‍ അങ്കണവാടി കെട്ടിടത്തിന്റെ മുകളില്‍ നിന്ന് വീണ് പരിക്കേറ്റ നാലുവയസുകാരി ചികിത്സയില്‍. ഇടുക്കി കല്ലാറിലെ അങ്കണവാടിയിലാണ് അപകടം സംഭവിച്ചത്. കഴിഞ്ഞ ദിവസം ഉച്ചകഴിഞ്ഞ് കെട്ടിടത്തിന്റെ രണ്ടാം നിലയില്‍ ഓടി കളിക്കുന്നതിനിടയിലാണ് കുട്ടി തെന്നി വീണത്. ആന്റോ- അനീഷ ദമ്പതികളുടെ മകള്‍ മെറീനയാണ് അപകടത്തില്‍പ്പെട്ടത്.
കുട്ടി വീഴുന്നത് കണ്ട് രക്ഷിക്കാനായി ചാടിയ അദ്ധ്യാപികയ്ക്കും സംഭവത്തില്‍ പരിക്കേറ്റിട്ടുണ്ട്. 2018ലെ പ്രളയത്തിന് ശേഷമാണ് വെള്ളം കയറുമെന്ന ഭയത്തില്‍ ഒന്നാം നിലയില്‍ പ്രവര്‍ത്തിച്ചിരുന്ന അങ്കണവാടി രണ്ടാം നിലയിലേക്ക് മാറ്റിയത്. ഭക്ഷണം കഴിച്ച ശേഷം രണ്ടാം നിലയിലെ കളിയ്ക്കിടെയാണ് മെറീന കാല്‍ വഴുതി താഴേക്ക് വീണത്.
Read more
കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലാണ് മെറീന. കുട്ടിയുടെ തലയോട്ടിയില്‍ പൊട്ടലേറ്റിട്ടുണ്ടെന്ന് ബന്ധുക്കള്‍ പറയുന്നു. രണ്ടാം നിലയിലെ അങ്കണവാടിയുടെ കൈവരികള്‍ അപകടകരമായ രീതിയിലാണ് നിലനില്‍ക്കുന്നത്. അപകടത്തിന് പിന്നാലെ പ്രദേശത്ത് നാട്ടുകാര്‍ പ്രതിഷേധവുമായി രംഗത്തെത്തിയിട്ടുണ്ട്.
