ഇടുക്കി കട്ടപ്പനയില്‍ പുഴുക്കള്‍ അടങ്ങിയ ചിക്കന്‍കറി കഴിച്ച മൂന്ന് വിദ്യാര്‍ത്ഥികള്‍ ആശുപത്രിയില്‍. ഹോട്ടലില്‍ വിളമ്പിയ ചിക്കന്‍ കറിയിലാണ് പുഴുക്കളെ കണ്ടെത്തിയത്. കട്ടപ്പന പള്ളിക്കവലയിലെ ഏയ്‌സ് ഹോട്ടലില്‍ നിന്ന് ആഹാരം കഴിച്ച കുട്ടികളാണ് ഭക്ഷ്യവിഷ ബാധയെ തുടര്‍ന്ന് കട്ടപ്പനയിലെ സ്വകാര്യ ആശുപത്രിയില്‍ ചികിത്സയിലുള്ളത്.
കുട്ടികളുടെ ആരോഗ്യനില നിരീക്ഷിച്ച് വരുന്നതായി ആശുപത്രി അധികൃതര്‍ അറിയിക്കുന്നു. നീന്തല്‍ പരിശീലനം കഴിഞ്ഞെത്തിയ വിദ്യാര്‍ത്ഥികള്‍ പള്ളിക്കവലയിലെ ഏയ്‌സ് ഹോട്ടലില്‍ നിന്ന് പൊറോട്ടയും ചിക്കന്‍ കറിയും കഴിച്ചു. കഴിക്കുന്നതിനിടയില്‍ വിദ്യാര്‍ത്ഥികള്‍ ചിക്കന്‍ കറിയില്‍ നിന്ന് പുഴുക്കളെ കണ്ടെത്തി.
ഇതോടെ കുട്ടികള്‍ സംഭവത്തിന്റെ ദൃശ്യങ്ങള്‍ പകര്‍ത്തി. പിന്നാലെ മൂവരും ഛര്‍ദ്ദിക്കുകയായിരുന്നു. തുടര്‍ന്ന് വയറുവേദന കൂടി അനുഭവപ്പെട്ടതോടെ മൂന്ന് വിദ്യാര്‍ത്ഥികളെയും ആശുപത്രിയില്‍ പ്രവേശിപ്പിച്ചു. സംഭവത്തില്‍ പരാതി ലഭിച്ചതോടെ ആരോഗ്യ വിഭാഗം ഹോട്ടല്‍ അടപ്പിച്ചു.